Шабытты шалқытқан шарапатты шара

Қостанай Меценаттар клубы өнер, мәдениет, ғылым, журналистика сынды салаларда озық шыққандарға «Қазына» және «Шабыт» сыйлықтарын тапсырды. Биыл он алтыншы рет өткізілген бүтін елдегі теңдессіз шараға облыс әкімі Архимед Мұхамбетов қатысты. Айта кетейік, конкурста мәдениет және өнер қызметкерлері, шығармашылық ұжым жетекшілері, тілшілер, ақындар, жазушылар, ғалымдар, білім беру саласының қызметкерлері кім үздікті анықтады. «Мирас» мәдениет сарайында өткен салтанатты жиынның ашылуында сөз сөйлеген облыс басшысы:

– Тобыл-Торғай өңірінде талай тарландар түлеп шыққан. Кешегі өткен ардаларымыздың жеңісті-жемісті жолын жалғайтын жастардың барына қуанамын. Міне, биыл да әр салада озық шыққан шын мықтыларды анықтадық. 2000 жылы елімізде мәдениетті қолдау жылы болып жарияланды. Дәл сол жылы өңірдегі шығармашылық иелерін қолдау мақсатында Қостанай Меценаттар клубы құрылған. Осылайша, облысымыздың Атымтай жомарттары мәдениет саласының иелеріне қаржылай қолдау білдіріп келеді. Қостанайдағы осы бастама Мәжіліске дейін жетіп, енді басқа облыстарға үлгі ретінде ұсынылды. Өнер адамдарының еңбегін ескерген қостанайлық кәсіпкерлерге мың алғыс, – деді.Архимед Бегежанұлы «Мәдени мұра» аталымы бойынша жеңіске жеткен ҚМПИ проректоры, педагогика ғылымдарының кандидаты Тілеген Ахметов пен танымал айтыскер ақын Айбек Қалиевке «Қазына» сыйлығын табыс етті.

Биылғы байқауға 97 ұсыныс келіп түссе, оның ішінде 32 адам мен 2 ұжым сыйлықтарға лайық деп танылды. Тағы бір қуанарымыз, меценаттар ауыр науқасқа шалдығып, емделуді мұқтаж еткендерге қомақты қаржы жұмсайды. Сондай-ақ, қолы қысқа адамдарға коммуналдық қарызды өтеуге, қысқа отын-су алуға да жомарт жандар қол созады.

2013 жылы меценаттар клубының мүшесі, Премьер-Министрдің орынбасары Дариға Назарбаеваның осы қорға қосқан қомақты қаржысына осы заманғы жедел жәрдем көлігі сатылып алынды, ол енді ел игілігі үшін қызмет етіп жүр. Облыс әкімінің айтуынша, осы уақытқа дейін жедел жәрдем көлігінің көмегімен төрт жарым мыңнан астам тұрғын емделді.

Жыл үздіктерін жеңістерімен құттықтап, Меценаттар клубының президенті Василий Розинов сөз алды.

– Бүгін – облыс мәдениеті үшін елеулі күн. Біздің клубтың сыйлығы шығармашылық иелерін шабыттандырып қана қоймай, қаншама таланттың жолын ашады. Бұл бастама дер кезінде қолға алынды. Сондықтан клубқа мүше меценаттардың еңбегін ерекше атап өткен жөн, дей келе, ғылым саласында жеткен жетістіктері үшін А.Байтұрсынов атындағы ҚМУ прфессоры, философия ғылымдарының докторы Сапар Қолдыбаевқа «Қазына», философия докторы Қуантар Әлихановқа «Шабыт» сыйлығын ұсынды.

 

Меценаттар барлық аталым бойынша қос сыйлықты табыстады. Жыл бойы жемісті еңбек еткен «Қостанай таңы» газеті бас редакторының орынбасары Жұматай Кәкімжанов «Журналистика» аталымында және тағы бір әріптесіміз, талантты ақын Жандос Жүсіпбек «Әдебиет» аталымы бойынша «Шабыт» сыйлығына ие болды.

 

Әр марапаттаудан соң жергілікті өнерпаздар, меценаттар сыйлығының алдыңғы жылдардағы жеңімпаздары концерттік бағдарлама қойды.

Жиылған жұрт Big-band, «Ақжелен» ансамбльдері, "Нью-Бойс" тобының, әншілер Нұрсұлу Құснетова мен Сергей Уваровтың, сондай-ақ, тағы басқа да көптеген биші-күйшілердің өнеріне қол соқты.

Биылғы жылғы жеңімпаздардың атынан мәдениет қайраткері Отаргүл Мұқатова сөз сөйлеп, алғысын білдірді.

 

Қасқырбай Қойшыманов.

Суретті түсірген Бағдат Ахметбеков.