Жүрегіме нұр құйған
Маусым айының бесі күні жетпіс жасқа толдым. Астана қаласының торқалы тойы алдында жұбайым Кәртай Ғаббасұлы, балаларым, немерелерім, құда-құдағиларым, достарым мен туған, туыстарым шын жүрегімен қуанып, той жасады. Еліміздің астанасында туған күнді тойлау менің жүрегіме нұрлы сәулесін құйды. Себебі, Астана – арман қала, менің мақтанышым. Қала жыл сайын ғана емес, ай сайын құлпырып келеді.
Астанаға туған өлкем Қостанайдан 2008 жылы 6 шілдеде қоныс аудардық. Сол күні мұнда үлкен мереке аталып өтті. Астананың туған күні жылма-жыл тойланғанда отбасымызбен шаттанамыз. Тұрғындар сүйікті қаланың келбетіне нұрлана қарайды. Биік-биік тұрғын үйлер мен мәдени нысандар бір-бірімен аса жарасымдылық танытады.
Қызымыз Салтанат аспирантураны тамамдағасын, 2002 жылы Астанада қызметке кірді. Қазір "Интергазда" менеджер. Үлкен қызым Ләззат "Цесна банкте" қызмет істейді.
Ерім Кәртай екеуміз балаларымыздың жемісті еңбек етіп жүргеніне дән ризамыз. Немерелеріміз де гүлдей жайнап өсіп келеді.
Бір сөзбен айтқанда, Астанадай сұлу қалада өмір сүру ерекше ғанибет дер едім.
Зәуреш Утина,
химия ғылымдарының кандидаты, профессор
Суретте: Зәуреш Есмұханқызы мен Кәртай Ғаббасұлы отбасымен бірге.
