Арзан көліктің азабы

"Қазақстандықтар барлығын сатып алып жатыр.  Аз-мұз бірдеңелер ғана қалды. Жылдар бойы қалыптасқан 500-600 мың рубльдік сегментті жай ғана жұлып әкетті. Барлығы рубльдің құнсыздануынан басталған еді".

Бұл ресейлік басылым таратқан ақпарат. Статистикалық деректерге сүйенсек, Қостанайдың өзіне желтоқсан айында 1500-ден астам көлік әкелінген. Челябі мен Самара қалаларындағы сатылымда тұрған автокөліктердің 70%-ға жуығы Тобыл өңірі тұрғындарының еншісіне тиіпті.

Ал, керісінше отандық автокөліктерге деген сұраныс 60%-ға төмендеп кеткен. Енді-енді аяққа тұрып келе жатқан қазақстандық автоөндіріске бұл ауыр соққы. Билік органдары Кедендік одаққа мүше  елдерден көлік әкелу үшін арнайы шарттар мен талаптар қойды. Яғни, оң жақ рөлдің болмауы, шыққан мерзімі 2010 жылдан кем емес, Еуро-4 экологиялық стандартына сай көліктерді ғана елімізге әкелуге рұқсат етіледі.

Қаңтар айының басынан бері Қостанайдың Садовая көшесіндегі тіркеу-экзамендеу бөлімінде жұмыс қызған. Ресейден автокөлік әкелген қостанайлық жүргізушілер мемлекеттік тіркеу белгілері мен нөмірлерді алу үшін кезек күтуге мәжбүр.

– Челябіден 2011 жылы шыққан KIA көлігін алып келдім. Оны тіркеу үшін бір аптадан бері осында келіп жүрмін. Кеңесші-мамандар халықтың көптігінен әлі бір аптадай күтетінімді айтты, – дейді қала тұрғыны Дулат Малшыбаев. 

Тіркеу-емтихан бөлімі бастығының орынбасары Аслан Балғабаевтың айтуынша, мұндай қарбаластың себебі Ресейден әкелінген көліктердің көптігі екен. Көліктерді тіркеу үшін сатып алынған жерге сұраным жіберіледі, содан кейін көліктің РФ-нан шығарылғандығы, ұрланбағандығы жайлы анықтаманы күту керек. Жауап келгеннен кейін ғана жүргізушіге нөмір белгісі беріліп, көлік Қостанайға тіркеледі.  

Қасқырбай Қойшыманов.