Жарқырап жайнай берші, сен Астанам!

Оқуға түссем деген асқақ арман жетелеп, 2009 жылы Елордаға жол тарттым. Сәтін салып Қазақ агротехникалық университетінің студенті атандым. Алғаш Астанаға келгенімде шаһардың сол жақ жағалауында орналас-қан зәулім Бәйтерек бірден көзге түсетін. Ал қазір аспанмен талас-қан биік ғимараттар жетерлік. Әсем құрылыс нысандары анадайдан көз тартады. Қарап отырып сүйсінесің.

Сарыарқа төсіндегі қаланың қызу тіршілігіне ілесіп келе жат-қаныма да бес жыл болыпты. Астананың үскірік аязына, толастамас жаңбырына, аптап ыстығына үйреніп, бауыр басып кеттім. Аз уақыттың ішінде Астана гүлденіп, шетелдік шаһарлардан кем түспейтін қалаға айналды. Бас қалада бір ай болмасаңыз кәдімгідей жатырқап қаласыз. Себебі, Астана ертегідегі Ертөстік батырдай ай санап емес күн санап өзгеріп, түрленіп отырады.

Астанаға республикамыздың түпкір-түпкірінен және көршілес мемлекеттерден қандастарымыз ағылуда. Олардың бірі оқу, енді бірі жұмыс іздеп келген жастар. Бас қалаға бастаған көштің нәтижесінде қаланың көлемі кеңейіп, халық саны артқан. Жан-жақтан жиналған отандастардың арқасында Астананың қытымыр қысы жұмсарғандай көрінеді.

Мен Елордадағы оқу ордасынан білім алғаныма мақтанамын. Себебі Астанада оқу екінің біріне бұйрмас бақ. Биыл университетті тәмамдап, ветеринария мамандығы бойынша диплом алдым. Алдағы міндет – мамандығым бойынша жұмысқа орналасу. Бес жыл бойы бас қалаға бауыр басып қалғандықтан, қызмет жолымды да осы жерден бастасам деймін.  

 

Гүлбейне  ӘМЗИНА,

С.Сейфуллин атындағы Қазақ агротехникалық университетінің түлегі