Ел өміріндегі елеулі шара
ҚР Парламенті мәжілісі мен барлық деңгейдегі мәслихат депутаттарын мерзімінен бұрын сайлау жұмыстары Арқалық қаласында да жоғары дайындықпен жүргізілуде. Ел рәміздері салтанат құрған сайлау учаскелері бозала таңнан сақадай сай әзірлікпен сайлаушыларын қарсы алды.
Жалпы, Арқалық қаласы бойынша 31 сайлау учаскесі бар. Оның 18-і – ауылдық жерде. Сайлаушылар тізімі – 25986 адам. Ауылдық жерде – 6881 сайлаушы. Арқалық қаласы аймағынан ҚР Парламенті мәжілісінің депутаттығына 1 үміткер, облыстық мәслихат депутаттығына 1 орынға 3 үміткер, қалалық мәслихат депутаттығына 13 орынға 40 үміткер қатысып отыр.
Айдос Айтжан, сайлаушы: Менің жасым 18 – де. Сайлауға алғаш рет қатысып отырмын. Қобалжу болды кімді таңдаймын деген. Елімізді көркейтуге, барлық қазақстан халқының жақсы өмір сүруіне үлес қосатын кандидаттарға дауыс бердім деп ойлаймын.
Түймегүл Жүсіпқызы, сайлаушы: Сайлау құтты болсын! Бәрімізге ортақ сайлау. "НұрОтан" партиясын қолдаймыз. Нұрлы жолымыз жасасын! Елді елу елдің қатарына қосамын деп бар мүмкіндікті жасап жатқан Елбасымызға рахмет.
Бүгінгі сайлауға немерем Нұрлыбекті осы сайлауға түсіп жатқан аға – апаларындай үлкен азамат болсын деп ырымдап ертіп келіп тұрмын. Немерем жақында тоғызқұмалақ ойындарынан облыс жеңімпазы атанды. Енді Орал қаласында өтетін республикалық жарысқа аттанбақшы.
Еліміздің азаматтары аман болып, мәңгілік ел болуды мұрат тұтқан қазақ елі көркейе берсін.
Сапар Шәріпұлы, сайлаушы: Ұлыстың ұлы күні қарсаңында елімізде үлкен науқан өтіп жатыр. Халық қалаулылары халықтың көңілінен шыға берулеріне сенім білдіреміз. Еліміз үшін еңбек етіп жатқан азаматтардың қадамдары сәтті болсын. Тәуелсіз еліміз көркейіп өсе берсін.
Қайрат Қалиханұлы, бақылаушы, "НұрОтан" партиясының сенімді өкілі:
Сайлау өте жақсы деңгейде өтіп жатыр. Халықтың келуі бәрі жақсы. Мүмкіндікті пайдаланып халықты алдағы келе жатқан Наурыз мерекесімен құттықтаймын. Еліміздің берекесі артып, көркейе берсін.
Зейнелғабден Қапсұлтанұлы, № 104 сайлау учаскесінің төрағасы: Сайлауға әзірлігіміз жақсы. Сайлаушылар көтеріңкі көңіл күймен келіп, өз дауыстарын көңілдері қалаған үміткерлеріне беріп жатыр. Сайлаушылардың тұрғылықты мекен -жайлары учаскемізде айқын көрсетіліп тұр. Сол бойынша сайлаушы азаматтар мен азаматшалар жеке куәліктерін жауапты өкілдерге көрсетіп, сайлау бюлетендерін алуда. Дауыс беру кабиналары жеткілікті қамтылған.
Асқар Батырханұлы, Арқалық қалалық сайлау комиссиясының төрағасы:
Сайлау жұмысы барлық сайлау учаскелерінде талапқа сай таңертеңгі сағат 7:00 – де еліміздің әнұранымен басталды. Сағат 8:00 – ге дейінгі уақытқа келіп түскен мәлімет бойынша 1689 сайлаушы өз дауыстарын беріп үлгірді. Сайлау штабында сайлау туралы мәліметтерді уақытылы қабылдап отырмыз. Ел өміріндегі маңызды шара бүгінгі кешкі сағат 20:00 – ге дейін жалғасатын болады.
Еліміздің мәртебелі сайлау науқаны Арқалық қаласында осылайша қарқын алуда. Сағат10:00 де қалалық сайлау штабынан алынған ақпарат бойынша 8631 сайлаушы дауыстарын берді. Бұл нәтиже сайлау көрсеткішінің 32,4 % – ын құрайды.
Мұрат Жүнісұлы.
Суретті түсірген автор.
Арқалық қаласы.
