Назарбаев мектебі Наурыз тойын тойлады

by Qostanaı tańy · 19.03.2016

Ұлыстың ұлы күнін Қостанай қаласындағы Назарбаев зияткерлік мектебі кең көлемде атап өтті. Бұл білім ошағы есігін ашқалы айтулы мерекені екінші рет тойлап отыр.

Соған қарамастан, мұғалімдер мен оқушылар ауызбіршілік танытып, тіпті, мектепте ұстаздық ететін өзге ұлт өкілдері де Наурыз мерекесінің қадір-қасиетін жақсы түсінген.

Осы күні қазақтың ұлттық киімін киіп, дәстүрлерін бек ұстанған.

Мерекелік іс-шараға Қостанай облыстық ардагерлер кеңесінің төрағасы Кенжебек Үкіұлы, өңірімізге белгілі кәсіпкер Сайран Бұқанов, ҚМУ-нің проректоры Алмасбек Әбсадықов сынды шаһардың құрметті азаматтары шақырылған.

Мектеп ауласы қазақ ауылына ұқсатып безендірілген.

Бір жағында жәрмеңке, қазақы киіз үй болса, енді бір қанатында спорттық ойындарға арналған алаңқай және наурыз көже мен бауырсақ әзірлейтін ошақ орнатылған.

Күй ойнап, әсем ән әуелеп, мерекелік көңіл-күй асқақтап тұрды. Концерт үш тілде өрбіді. Ортаға екі жаршы шығып, Наурыз тойының басталғанын жұртшылыққа жария етіп қуантты.

Содан соң Наурыз мерекесімен халыққа құт-береке ала келетін Қыдыр ата еніп, жиналған жұртшылыққа ақ батасын беріп, құрметті орнына жайғасты.

Артынша құттықтау сөз кеш қонағы Кенжебек Үкіұлы мен Назарбаев Зияткерлік мектебінің директоры Думан Сапақовқа берілді.

Кенжебек ағамыз балғындарды жаңа жылдың басталуымен құттықтап, оқуда озат, ата-аналарының мақтанышы болып, ел мерейін асқақтатын ұл-қыздар боп өсуін тіледі.

Ал, мектеп директоры Сапақов мырза оқу жылының үшінші тоқсанының аяқталғанын айтып, оқушылардың көктемгі демалыста жақсы демалуына тілектестігін білдірді.

Мерекелік іс-шара мектеп өнерпаздарының өнерімен жалғасты.

Қазақ халқының «бесікке салу», «тұсау кесу», «бет ашу» сияқты салт-дәстүрлерінен саханалық қойылымдар көрсетіліп, жас ақындар айтысы да ұйымдастырылды.