ИНДУСТРИЯЛЫҚ АЙМАҚ ҚҰРЫЛАДЫ
Инвестициялар және даму министрі Әсет Исекешев жұмыс сапарымен Қостанайға келді. Алдымен Әсет Өрентайұлы “Агромаш Холдинг” АҚ мен «Сарыарқа АвтоПром» ЖШС өндіріс алаңдарына беттеді. 
Мұнда министрмен бірге «Қазақстан Даму Банкі» АҚ Басқарма төрағасы Болат Жәмішев, Қостанай облысының әкімі Архимед Мұхамбетов, Allur Group акционерлері, түрлі компания басшылары және шетелдік автокөлік зауыттарының өкілдері болды.
Мұнда министрмен бірге «Қазақстан Даму Банкі» АҚ Басқарма төрағасы Болат Жәмішев, Қостанай облысының әкімі Архимед Мұхамбетов, Allur Group акционерлері, түрлі компания басшылары және шетелдік автокөлік зауыттарының өкілдері болды.
«Allur Group» АҚ Директорлар кеңесінің төрағасы Андрей Лаврентьев IVECO, Peugeot, Jac көліктерінің құрастырылу барысымен таныстырды. Делегация мотор бөлігін дәнекерлеу учаскесі мен құрастыру аймағын аралап, ондағы жұмыс жағдайын бақылады.
– Былтырғы жылы Елбасы Н.Назарбаев Франция, Қытай, Италия секілді автокөлік шығарушы алпауыт елдерде іссапармен болып, Қазақстанда автокөлік кластерін жасау үшін келісімге қол қойған еді. Қостанай – елдегі автоөндірістің басты орталығы. Биыл Қостанайға мемлекет қаржысынан 1 млрд.теңге индустриалды аймақ құруға бөлді. Бүгінгі жиынға қатысып отырған «СМС», «IVECO», «GlobaLink» және басқа да компания өкілдеріне алғысымды білдіремін, – деді Әсет Исекешев.
Осы уақытқа дейін “Агромаш Холдинг” АҚ мен «Сарыарқа АвтоПром» ЖШС 25000 Jac автокөлігін шығарды. Ендігі мақсат – экспортқа шығару. Ал атақты «CNHI» компаниясының төрағасы Роберто Вальфре Қостанайда құрастырылған көліктердің сапасына жақсы бағасын берді. Жоспар бойынша бастапқы 100 автокөлікті экспортқа шығармақшы.
– Облыста индустриалды аймақ құру экономиканың басым секторларына отандық және шетелдік инвестицияларды тарту үшін қосымша қолайлы жағдайлар жасайды. Біз үшін барлық жағынан алғанда маңызы зор. Қостанайдағы осы ірі екі компания жоспарды толықтай орындайды деп сенемін. Құрылыс барысы қадағаланып отырады, – деді облыс әкімі Архимед Мұхамбетов.
Қостанай қаласында индустриалдық аймақты құру тұжырымдамасын «ПрайсуотерхаусКуперс Такс энд Эдвайзорин» ЖШС директоры Наталья Лим таныстырды.
Кездесу барысында Қостанайлық автошығарушылар мен шетелдік автокөлік өнеркәсіптерінің арасында стратегиялық серіктестік бойынша келісімге қол қойылды. Тараптар бірнеше салалардағы жұмысты белсенді жүргізу жөнінде шешімге келді. Оның ішінде инвестиция бағыты бойынша жұмыстарға барынша басымдық берілетін болды.
Қасқырбай Қойшыманов.
Суреттерді түсірген Бағдат Ахметбеков.
