Жылдың алғашқы жәрмеңкесі өтті

Бүгін Спорт сарайында ауылшаруашылық өнімдерінің жәрмеңкесі өтті. Жылдың алғашқы сауда-саттық мерекесіне облыс орталығы мен 11 ауданнан 130 тауар өндіруші өз өнімдерін тұрғындарға арзандатылған бағамен ұсынды.

Жәрмеңкеге жұртшылық таңғы сағат 7-ден жинала бастады. Ғимарат ішін лық толтырған қарасы қалың халық түс ауғанша тарқаған жоқ. Сеңдей соғылысып, сөре біткенге ұзын-сонар кезекке тұрды.

Жәрмеңкеге 23 мың тонна ет, 20 тонна картоп, 114 мың дана жұмыртқа және 5 тонна сүт өнімдері әкелінген. Ауылшаруашық өнімдерінің нарықтағы бағадан 15-30 пайызға дейін арзанға сатылып жатқанына тұтынушылар да, саудасы қызу жүрген сатушылар да дән разы. Мәселен, қала тұрғыны Ғани Бекболатов азын-аулақ азық-түлік алуға келіп, бағаның мұншама арзандығына көз жеткізген соң, мүмкіндігінше молынан қорланып алуды ұйғарыпты.

-Айталық, картоптың келісін дүкендерден 85-90 теңгеден алып жүр едік, жәрмеңкеде небары 55 теңгеден сатылып жатыр. 5 литрлік сұйық майың супермаркеттерде 2000 теңге тұрады, ал мына жерде көз үйренген бағадан 25 пайызға дейін төмен екен. Әуелде жоспарда болмаса да, қазір ет сатып алғалы тұрмын. Жалпы, осындай халыққа тиімді жәрмеңкелер жиі өткізіліп тұрса екен,- дейді ол.

 

 

Жылдың алғашқы жәрмеңкесінің барысымен танысып, өнімдер бағасын бақыламаққа облыс әкімінің бірінші орынбасары Ғауез Нұрмұхамбетов және қала әкімі Базыл Жақыпов арнайы келіп қатысты.

 

– Бұл – араға бір ай салып өткізіліп отырған жәрмеңке. Бұл шараны айына бір рет ұйымдастыру ұйғарылып отыр. Келесі жәрмеңке ақпан айының орта шенінде, одан кейінгісі көктемнің алғашқы мейрамы – 8-наурыз қарсаңында өтпек. Көктемгі егіс науқаны алдында да сөрелерді жаю жоспарда бар. Бағаға келер болсақ, өздеріңіз көріп отырғандай, өнімдер құны 15-30 пайызға жеңілдетілген. Осы бағаны тұрақты түрде ұстауға тырысамыз,-деді Ғ.Нұрмұхамбетов тілшілерге берген сұхбатында.

 

Жандос Жүсіпбек

Суреттерді түсірген Бағдат Ахметбеков