Қылқаламшының кезекті көрмесі мұражайда ашылды

Бүгін облыстық тарихи-өлкентану мұражайында белгілі суретші, ҚР суретшілер Одағының мүшесі Георгий Соковтың шығармашылығына арналған "Театр. Өмір. Суреші" атты көрме ашылды. Бұл шара есімі елге танымал Георгий Михайловичтің 75 жылдық мерейтойына орайластырылып отыр. Суретшілік өнердің сан қырлы саңлағының туындылары мұражайдың көрме залына ілінді. Қай еңбегіне зер салсаңыз да шеберлікке көз жеткізіп, қылқалам құдіретіне мойынсұнасыз. Қанық бояу, сыршыл бейнелер оның айрықша дарындылығына сендіреді… Көрмеге бұл жолғы қойылған суреттер топтамасының ортақ тақырыбы – театр. Тізбелер болсақ, Э.Ионескудің "Мүйізтұмсық", Е.Шварцтың "Айдаһар", Л.Украинканың "Тас мейман", А.Чеховтың "Шағала", Ж.-Б.Мольердің "Жорж Дандем", Лопе де Веганың "Ойлап табылған ғашықтар"  пьесалары желісіндегі спектакльдерге және "Конек-Горбунок" балетіне жасаған декорация эскиздері ілінген. 

Суретшілік өнерін осынау салаға арнауының да себебі бар. Ол табаны күректей 30 жыл бойы М.Горький атындағы облыстық орыс драма театрында қызмет етті. Осы жылдар ішінде Г.Соков сценограф ретінде театрдың сүйкімі мен мазмұнының арта түсуі жолында күшін салды. Әмбебаптығы арқасында қойылымдардың режиссерлық идеяларын, көркемдік шешімдерін жандандыруға елеулі үлес қосып келді. Мінекей, бүгінгі көрермендері назарына ұсынылған көрме де көп жайдан сыр байқатса керек. Шараға қостанайлық суретшілер, облыстық мәдени мекемелердің қызметкерлері, Қостанай құрылыс колледжі мен Қостанай педагогикалық колледжінің студенттері келіп қатысты. Көрмені ұйымдастырушылар қонақтарға Г.Соковтың шығармашылығымен, еңбек жолымен жан-жақты таныстырды.

 

Ж.Бораш