Тобыл топырағындағы тұңғыш фильм (видео)

Қостанайда қысқаметражды "Саяқ" фильмінің тұсаукесері өтті. Туынды Қазақ хандығының 550 жылдығына арналған. Жобаның авторы – талантты театр және кино майталманы, ҚР Еңбек сіңірген қайраткері Қонысбек Бегайдаров, ал қоюшы режиссері І.Омаров атындағы Қостанай облыстық қазақ драма театрының жас актері Олжас Бегайдаров.

Бұл фильм республика театрлары арасында және облыста тұңғыш рет түсірілген кәсіби көркем туынды. Түсірілім жұмыстары былтырғы наурыз айында басталған. Нүктесі тамыз айында қойылды.

 

Оқиға желісіне  он жетінші  ғасырдағы  қазақ-жоңғар шапқыншылығы арқау болады.  Негізі,  басты кейіпкер – Саяқ  сол кездегі қазақ батырларының жиынтық образы.  Фильмде шағын бір қазақ ауылындағы батырдың баянды махаббаты суреттелген.

 

Басты рөлді қарағандылық Қайрат Кемалов ойнады. Сондай-ақ, есімдерін облыс таныған Айбол Шәкіржанов, Жібек Жолдыбай, Әлімхан Мырзахан, Зәмзәгүл Балтабаева, Ақдәмен Досановаларға бір-бір рөл бұйырыпты. Жоңғар батырының рөлін Қонысбек Бегайдаров сомдады.

Айта кету керек, фильмге кеткен қаражат, қазақ-жоңғарлардың киген киімдері, қару-жарақтары, әбзел-саймандары ынталы азаматтардың, демеушілердің есебінен жүрді. Әрине, көрерменнің көңілі кеңпейіл, оның үстіне көп жылдан бері қазақ тарихы туралы татымды дүниенің болмауы «Саяқтың» аз-мұз кемшіліктерінен гөрі, артықшылықтарын ауыз толтырып айтуға итермелейді.

Облыстық мәдениет басқармасының бастығы Лариса Сероус фильм тұсаукесерімен құттықтап, түсірілім барысында айрықша еңбегі сіңген жастарға алғыс хат табыс етті.

 

Олжас БЕГАЙДАРОВ, қоюшы режиссер:  Бәрінен бұрын фильмді түсірер кезде біраз қиындықтарға тап болдық. Кино тудыру үшін алдымен бір жақсы сценарий керек. Сценариін жазу үшін жезқазғандық Кенжебай Ахметовке қолқа салдық. Ол кісі бірден келісе кетті. Негізі, киноны әр түрлі ракурстан түсіру қажет қой. Осы жағынан келгенде қолымыз  жіпсіз байланды. Меншігімізде қоюшы оператор Хамза Нүрпейісовтің жалғыз камерасы мен микрофонынан өзге құрал болған жоқ. Барлығын сонымен түсірдік. Жалпы, түсіру тобы бірнеше адамнан құралады емес пе?! Бізде оның бірі болған жоқ. Барлығын өнерге жанашыр адамдардың көмегімен алып шықтық.

 

 

 

 

Ерсайын ТӨЛЕУБАЙ, режиссер-драматург: Кино – ұлттық мәдениеттің ғана емес, идеологияның да құралы. Жеке талантқа тұсау салған уақытты да көрдік. Бүгін Олжастың үлкен ақшамен емес, киноға деген махаббатпен түсірген тырнақалды туындысын көрдім. Мұны қатты сөгуге болмайды. Қостанай киноөнерінің тұлпары бәйгеге қосылды деп баға берер едім. Себебі, еліміздің басқа театрларында мынадай бастама қолға алынбаған еді. Қазақ хандығының 550 жылдығына арналған жоба дәл уақытында, келесі жылға созылмай, сәтті аяқталды.

Саяқ батырдың өмірі мен сол кезеңдегі ірі тарихи оқиғаның өріліп, тұтасуын суреттейтін қысқаметражды фильм жұртшылыққа ұнайды деген ойдамын.

 

 

Қасқырбай Қойшыманов