Екі айда бой көтерген құрылыс

Қостанайдың КСК шағын ауданында жылдам қарқынмен үш қабат балабақша құрылысы бой көтеріп қалды. Егер осы жұмыс жалғаса берсе, облыс орталығы келер жылдың жазында тағы бір көрікті де сәулетті нысанмен толықпақшы. 280 орынға арналған бөбекжай құрылысының бас мердігері – өңірімізге белгілі «Ұлан» ЖШС.

 

Әрине, жұмыстың уақтылы орындалуына кедергілер болмай қойған жоқ. Былтыр қараша айында мемлекеттік сатып алу кезінде Бейбіт Сейтаев басқаратын «Ұлан» серіктестігі жеңіп шыққанмен, қалалық құрылыс бөлімі «Стройметсервис-2007» компаниясымен келісім-шарт жасасып, дау осыдан басталып еді. Қаншама сот отырыстары болды. Ақыры сот төрелігі «Ұлан» ЖШС пайдасына шешіліп, компания құрылысты жүргізетін болып түбегейлі бекітілді. Бастапқыда балабақша құрылысына 600 млн. теңгегеден артық қаржы бөлініпті.

 

– Құрылыс 4 қазанда басталды. Жобалауды «Агропромжоба» ЖШС жасады. Биыл жыл аяғына дейін республикалық бюджеттен бөлінген 390 млн. теңге игеріліп болу керек. Әзірге уақыт жағынан 8 күнге алда келеміз, – дейді «Ұлан» ЖШС директоры Бейбіт Сейтаев.

Республикалық қазынадан жұмсалған қаражаттан бөлек, жергілікті бюджеттен 144 млн. теңге бөлінген. Ол қаржы келер жылы игерілмек. 4,5 мың шаршы метр балабақша ғимаратының сырты балалар алаңдары, топ алаңдары, ойынға арналған жабық орындармен толығады. Төсемтастардан жол салынады. Аумақ абаттандырылады. Балабақша сырты темір шарбақ дуалмен қоршалмақ.

Қазір қарқын алған жұмысқа қажетті барлық техника жұмылдырылған. Құрылыс материалдары, соның ішінде кірпіш, жабын плиталары Қостанайдағы «Тұран», «БК-Маркет», «БК-Строй», «Романа» компанияларынан жеткізіледі. Бейбіт Сейтаев қосалқы мердігер ретінде «Жұма К-2030» (Жұмағазы Салмағамбетов), «Нұр-Қазбек» (Нұрмұхамбет Бейсенбаев), «Статус-Трейд» (Дулат Бірімжанов) серіктестіктерінің бригадаларын шақырдым дейді. Бұлар күн-түн демей, екі ауысымға көшкен. Балабақша төбесін 25 желтоқсанға дейін аяқтап, ішкі жұмыстарына ауысу керек.

«Ұлан» серіктестігінің басшысы ұзақ жылғы тәжірибелері бар құрылыстың бас инженері Рысбек Мақашев, учаске бастығы Виктор Саблинге үлкен сенім артады. Енді сол тәжірибелі мамандардың қатарын «Жұма К-2030» жас бригадирі Мақсұт Шорин толықтырып отыр.

Әзірге күннің жылылығы да құрылысқа серпін беруде. Ендігі кезекте ішкі сылақ жұмыстары күтіп тұр. Жарық, жылу, су, өртке қарсы құралдар, вентиляция, басқа да коммуникациялық, сантехникалық жұмыстар орындалады. 

– Келер жылдың жаз ортасына дейін балабақша пайдалануға тапсырылады. 3 жылға кепілдік береміз. Төсек-орындар, шкафтар, компьютерлер, перделермен жабдықталады. Негізінен алдымен отандық тауарлар сатып алынады. Егер өзімізде өндірілмейтін болса, оларды шетелден аламыз. Айтпақшы, мұнда қойылатын ең соңғы үлгідегі интерактивті тақталар мен үстелдердің баламасы әзірге Қостанайда жоқ. Міне, осы мақсатқа жалпы сомасы  72 млн. теңге қарастырылған, – деді «Ұлан» ЖШС директоры Бейбіт Сейтаев.

 

Қыдырбек ҚИЫСХАНҰЛЫ

Суреттерді түсірген Бағдат АХМЕТБЕКОВ.