Халықтың жоғын жыр қылды

Бүгін Ахаң атындағы ҚМУ-нің акт залында Қазақ хандығының 550 жылдық мерейтойына арналып облыстық жас ақындар айтысы өтті. Жас айтыскерлер тақырыпқа сай шымыр шумақтар өріп, мүмкіндіктерінше өзге де өзекті қоғамдық тақырыптарды өлең етті. Арқалық қаласы мен Аманкелді ауданының және облыс орталығының жас өрендері өнер көрсетті.
Айтыскерлердің өнеріне халық ақыны Әсия Беркенова, көрнекті ақын-жазушылар Ғұмар Ахметчин, Нағашыбай Мұқатов және Ақылбек Шаяхметов қазылық жасап, лайықты бағаларын берді.

 

 

 

Айтыскерлерге көрермендер қиқулап қолдау көрсетіп, қолпаштап отырды. Жұп-жұп болып сынға түскен айтыскерлердің ұпайы ортақ бағаланып, жүзден жүйрік болып жергілікті айтыскер Бақытжан Әлкебаев оза шапты.

Екінші орынға бірден екі ақын ие болды. Олар – ҚМУ-нің студенттері Дастан Беков пен Нұрсұлтан Қасым. Үшінші орынға ҚМПИ-ның студенті Нұрия Ақбабақызы мен Арқалықтан келген ақын Хайролла Һафиз табан тіреді. 

Кенже ҚОНЫСБАЙ

Суреттерді түсірген Бағдат АХМЕТБЕКОВ