Белсенді жастар конференциясы

М.Дулатов атындағы ҚИнЭУ-де Қостанай қаласы жастарының Көшбасшылар конференциясы өтті. Шараға облыс орталығындағы ЖОО және орта мектептерінің белсенді жастары қатысты. Мақсат – араларынан 20 адамды жастар мәслихатына іріктеу, сайлау. Ол құрамға мүше болу үшін әрқайсысы шара барысында барынша белсенділік танытып, өздерін жан-жақты көрсетулері керек болды. Үміткерлер үш аудиторияға бөлініп, оларға мәслихаттың экс-мүшелері тренингтер жүргізді. Алғы сөзді алған қалалық мәслихаттың мүшесі Татьяна Антонинова: «Бұл Көшбасшылар конференциясының нысанаға алып отырғаны – анағұрлым белсенді жастарды қаланың қоғамдық-саяси өміріне араласуға тарту, мемлекеттік билік органдары мен жастар арасындағы әр тараптық байланыстарын бекіте түсу. Әрине, сондай-ақ Қостанай қаласы Жастар мәслихатының кезекті сайлауын өткізуді көздейміз»,-деді.

Бұл конференция ҚИнЭУ-де осымен төртінші жыл өткізіліп отыр. Осы жылдар ішінде бірнеше елгезек жас мәслихат мүшелігіне жолдама алды. Ал, мәслихат түлектері бүгіндері қоғамдық-саяси ортада өз орындарын тапқан білікті мамандарға айналып отыр.

 

Ж.Балғынбекұлы

Суреттерді түсірген Айбек Жүзбай.