«ЕҢБЕК ДАҢҚ КІТАБЫНЫҢ» ЭСТАФЕТАСЫ ЖАНКЕЛДИНДІКТЕРГЕ ТАПСЫРЫЛДЫ

Бүгін амангелділіктер облыс әкімі Н.М.Садуақасовтың бастамасымен Қостанай облысының 80 жылдығы қарсаңында ұйымдастырылған Даңқ Кітабын Жанкелдин ауданына салтанатты түрде тапсырды.

Бұл рәсімге Амангелді және Жанкелдин аудандарының жұртшылық өкілдері мен тыл және еңбек ардагерлері және облыстық ішкі саясат басқармасының басшысы Ж.Қ.Мақанов бастаған облыстық бірқатар мекеме, қоғамдық ұйым басшылары қатысты.

Салтанатты рәсімде Амангелді ауданының әкімі Ж.Таукенов құттықтау сөз сөйледі. Ол биылғы жылы еңбек адамдарына көрсетілетін құрметті одан әрі өрістетуге байланысты ауданнан шыққан 15 Социалистік Еңбек Ерлеріне арнайы ескерткіш тақта орнатылғанын атап көрсетті. Енді облыс әкімінің ұйғарымымен өлкеде тұратын барлық аудандар мен қалалардың мақтанышы болған Еңбек Ерлері мен әр саладағы саңлақтардың өмірі мен қызметін қамтитын Даңқ Кітабының  жас ұрпақты еңбекке тәрбиелеуде алатын орны ерекше екенін айта келіп, осы кітапқа Амангелді ауданының өмірден өткен 15 Социалистік Еңбек Ерлерімен қатар қазіргі таңдағы майталмандары кіргізілгенін, ал мұның – Елбасымыздың «Еңбек қоғамына қарай 20 қадам» атты стратегиялық мақаласында атап көрсетілген аса маңызды тұжырымдарды одан әрі жүзеге асыруға өз ықпалын жасайтынын айтты.

Мұнан соң сөз алған облыстық ішкі саясат басқармасының басшысы Ж.Қ.Мақанов та «Еңбек Даңқ кітабының» мән-мазмұны, маңызы жайлы көлемді әңгімелеп берді.

Келелі мәжілісте ауданның атқамінерлері мен бетке ұстар тұлғалары да сөз сөйледі. Шараның шарықтау шегінде Ж.Қ.Таукенов көршілес аудан делегациясын бастап келген Түбекбай Әубәкіровке облысымыздың Даңқ Кітабын салтанатты түрде табыс етті.

-Құрметті амангелділіктер! Сіздер облысымыздың Даңқ Кітабын біздерге өте жоғары құрметпен тапсырып отырсыздар. Бұл – бізге үлкен міндет жүктейді. Біз де облысымыздың Даңқ Кітабын келесі ауданға сіздер сияқты жоғары деңгейде тапсыруға күш саламыз! – деді Т.Әубәкіров.  

Салтанатты рәсім соңынан батпаққаралық өнерпаздар жұртшылыққа тамаша концерт сыйлады. Амангелділіктердің Даңқ Кітабын көршілес ауданға салтанатты түрде табыс етуі жоғары деңгейде ұйымдастырылғанына облыстық ішкі саясат басқармасының басшысы Жанділдә Қожахметұлы оң баға берді.

 

Хамитбек МҰСАБАЕВ,

Амангелді ауданы.