Жүзден жүйрік

Қостанайлық Мәулен Кәдіров пен Мария Кунщикова «Bala Turkvizyon-Казахстан» ән жобасының жартылай финалына өтті. Бұл жобаны ұйымдастырушы Әлия Назарбаева екенін айта кетуге болады.

Байқаудың мақсаты – қазақ мәдениетін әлемге паш ету. Талантты жастардың бағын ашу. Әнге деген қызығушылықты ояту.

Еліміздің түкпір-түкпірінде іріктелген сайысқа тек қана 8 бен 13 жастың аралығындағы балалар қатысатын көрінеді. Сол бәйгеге қостанайлықтардың бағы жанып, жартылай финалда өнер көрсететін болды.

Мәулен өңірге, елімізге белгілі әнші Манапбек Кәдіровтің ұлы. Ұлының бәйгеде озып шыққанына қуанған әкесі:

– Баламның талантын бұрыннан біліп, байқап жүрмін ғой. Бірақ қатарынан оза шауып, бәйге алатынын күтпедім. Қуанышым қойныма сыймай тұр. Баласы атқа отырса, тақымын қысатын қазақтың бірі болғасын ризашылықпен айтып отырмын,- деді Манапбек Кәдіров.

Жолдамаға қолы жеткен балғындар енді Алматы қаласындағы «Жұлдыздар үйіне» аттанбақшы. Мұнда кәсіби дайындықтан өтіп, 16-17 қыркүйек айында Астана қаласында жартылай финал мен ақтыс сайыста өнер көрсетеді. Кішкентай талантты жандардың ойы – Түркияның Стамбул қаласында өтетін балалардың халықаралық түркітілдес «Bala Turkvizyon» ән байқауына қатысып, ел намысын қорғау. Шәкірттерінің жүзден аса үміткерлер арасынан оза шауып бәйге алғанына ерлі-зайыпты Түлкібек пен Бағлан Рысмағанбетовтер де дән риза. Үмітімізді ақтады деп қуануда.

 

 

Нұрболат МЕШІТБАЕВ.