“Үміт-Надежда” қоғамдық бірлестігі 10 жылдығын атап өтті

Қалалық балалар шығармашылығы үйіне  мүмкіндігі шектеулі жандар жиналды. Бәрі де кезінде өздеріне көмек қолын созып, өмірге деген құлшыныстарын арттыруға жәрдемдескен бірлестік басшыларының қуанышына ортақтасып, өздерінің жылы лебіздерін жеткізуге келіпті.  Сондай-ақ, мерейтоймен құттықтауға арнайы халық қалаулылары И.Аронова мен О.Киколенко және Астана, Ақтөбе өңірлеріндегі қоғамдық ұйымдардың басшылары да келген екен…

Фоеде “Нұр Отан” облыстық филиалының қолдауымен “Кедергісіз келешек” жобасы аясында мүмкіндігі шектеулі жандардың қолынан шыққан бұйымдардың көрмесі ұйымдастырылды. Олардың қолынан шыққан сан түрлі дүниелер көздің жауын алады. Қызығушылық танытқандар бұйымдарды сатып алып, аз да болса мүмкіндігі шектеулі жандарға көмек қолын созуға тырысты.

Ал, шығармашылық үйінің актзалында өткен салтанатты шара арбадағы бимен басталды. Сахнаға шығып, мерейтоймен құттықтағандар қоғамдық бірлестіктің жеткен жетістіктерін сөз етіп, Дүйсенғали мен Арунаға алдағы уақыттар да талай белестерді бағындыруларына сәттілік тілеп, сый-сияпаттарын жасады. 

 

Қарлығаш ОСПАНОВА

Суретті түсірген Айбек Жүзбай