Жастар әлемі
Журналистік міндетімізді орындап қаншама аудан, ауылдарды аралаймыз. Жастар қосымшасы үшін жас мамандармен танысамыз. Танысып, газет бетіне жарқыратып шығара қоямыз. Ауылды дамытамын деп барған жастар бұған қуанышты болады деген сенімдеміз. Бұл жолы да жолымыз іргелес жатқан Қостанай ауданына түсті. Аудан орталығында "Алтын дән" мәдениет үйі бар. Мәдениет үйінде жаны өнерге жақын жандар еңбек етеді. Жастар жағы да аз емес. Қолдарына аспаптарын ұстаған өнерлі жастар бізді жақсы қарсы алды. Өздері жайында айтып, қашан газет бетінен шығатындарын сұрап мәз-мейрем болысып та қалды.
Жолымды өнерден таптым
Сол жастың бірі – Айгүл Нұрахметова. Әңгімесін өзі жайында бастаған Айгүл алғашында мамандықта таңдауда қателескенін білдірді. Ол осы мәдениет үйіне екі жыл бұрын іс жүргізуші болып келген екен. Бірақ нағашы жұрты өнерге жақын болғандықтан Айгүл де ән салғанды бала күннен ұнататын. Тағдыр өзі алып келді ме, әйтеуір өнердің ортасына келген соң шабыты оянды. Ән салып, топ та құрды. "Айару" деп аталатын топтың құрамында өзі де бар. Ауданда болып тұратын кештерде ән салады. Одан қалды жеткіншектерді тәрбиелеп, жол сілтейтін вокалдық топ та ашты. Бірі "Балдәурен" деп аталса, екіншісі "Жұлдыз" тобы.
– Балаларға ән салуды, сахнада өзін қалай ұстау керек екенін үйретемін. Жас маман бол-ғандықтан өзімді көрсетіп, жақсы жұмыс істеуге тырысып бағамын. Және біздерге жасалған жағдай да жақсы, – дейді Айгүл.
Қобызшы қыз
Ал Әйгерім Көшкінбаева – қобызшы. Мектеп бітірген соң колледжге түсіп, қобыз сыныбын аяқтады. Қобызды үйреніп кету оңай болмаса да Әйгерім талмай еңбек етті. Ақыры дегеніне жетті. Қазір қобызда тамаша ойнай алады.
– Қобызды домбыра сиықты тез үйрене алмайсың. Ал менің жаныма қобыздың үні жақын. Шығармаларды орындағанды ұнатамын. Үйренгім келеді дейтін жасөспірімдерге үйретемін. Мәдениет үйінде жұмыс істеп жақаныма үш жыл болды. Жастар бірігіп, талай мерекелрді өткіздік. Және "Дипломмен – ауылға!" жобасының аясында пәтер де алдым. Мәдениет үйінің ішінен халық шығармашылығы орталығы ашылған еді. Орталықта қаншама жұмыстар атқарылады. Әрбірін қызықты өткізіп, көпшіліктің де көңілінен шығуға тырысып бағамыз, – дейді қобызшы қыз.
Әсем әуенді әуелетіп
Әуенді түрлендіріп, жан бітіретін жігіт Жәнібек Әбішев. Қолына жаңа аппаратура түскеніне мәз. Бұрын болмаған мұндай қондырғы әр кештің ажарын ашып, түрлендіріп жібереді.
– Аудан әкімі көңіл бөліп, мәдениет үйіне осындай тамаша тарту жасаған болатын. Содан бері ісіміз алға басып, тынысымыз кеңейді десе де болатындай. Әндерді жаздырып, құбылта түсеміз, – дейді Жәнібек.
Техниканың тілін меңгерген жас жігіттің еңбек етіп жатқанына екі жыл. Осы уақыт ішінде ауылды жерлерге жастар көптеп келіп жатқанын айтады. Әзірге баспана мәселесі қинап тұр. Десе де бұл қиындықтың шешімі шығып жатса жас маманның жолы болғаны.
Қостанай ауданы.
