Қарағандылықтарға көмек жіберілді

Қостанай облысынан су тасқынан зардап шеккен қарағандылықтарға 10 миллион теңгенің 100 тонна азық-түлігі жіберілді. Жолаушыларды шығарып салуға облыс әкімінің орынбасары Базыл Жақыпов келді.

Облыс орталығынан шыққан жеті көлік Қарағанды облысын бетке алған. Көлік керуеніне Астанадан тағы үш машина қосылмақ. Оларға 40 тонна картоп, сонша мөлшерде ұн, 5 тонна макарон, 3 тонна сұйық май, 55 мың бірлік жұмыртқа, консервленген 2 тонна ет, 2 тонна қант тиелген.  Азықтың Тобыл өңірінің жергілікті өнімі екенін айта кеткен жөн. Облыстың 25 өндіріс орындары мен кәсіпкерлері өз өнімдерімен барынша бөлісіп, көмектен тартынған жоқ. Гуманитарлық жүк  Қарағанды облысындағы Қызыл Жарты Ай қоғамының филиалына жеткізіледі.

 

Махаббат Бекбай