Депутаттар ҚХА жылын насихаттады

"Менің Қазақстаным" пойызының депутаттар тобы "НұрОтан" партиясы қалалық бөлімшесінің мәжіліс залында қоғамдық қабылдау өткізді. Мұнан соң қаладан сыртқарырақ орналасқан психоневрологиялық үй – интернатында болып, "ҚХА – 20 жарқын іс!" эстафетасы аясында ұжымға теледидар тарту етті. Тағдыр теперішін тартқан жандарға арнайы сыйлықтар ұсынды және олардың өнерін тамашалады.

 Ы. Алтынсарин атындағы Арқалық мемлекеттік педагогикалық институтының мәжіліс залында "Бейбітшілік пен қоғамдық келісімнің қазақстандық үлгісі" атты дәріс – таныстыру өткізілді. Онда "Менің қазақстаным" делегация жетекшісі Ғ. Телебаев, ҚР Парламент Мәжілісінің депутаты, ҚХА депутаттар тобының мүшесі З. Саяпова, ҚХА ғылыми – эксперттік кеңесінің мүшесі Ғ. Төлеғұл, "Қарашай – балқар" этно – мәдени бірлестінің жетекшісі, ҚХА мүшесі Л. Хочиевалар сөз алып, еліміздегі ынтымақ пен бірліктің арқасында ортақ отанымызды мекендеген ұлттар мен ұлыстардың бір үйдің баласындай тату-  тәтті ғұмыр кешіп отырғандығын әңгіме өзегіне айналдырды.

 Институттың конференц залында журналистермен брифинг өткізілді. Брифингке облыстық ішкі саясат басқармасының басшысы Ж. Мақанов, облыстық "Қостанай таңы" газетінің директор – бас редакторы Ж. Аязбеков және жергілікті БАҚ өкілдері қатысты. 

                                                                         

Мұрат Жүнісұлы

Арқалық қаласы.