«ТОБЫЛ ТАРЛАНЫ» анықталды!

«Қостанай таңы» газеті ұйымдастырған «Тобыл тарланы» атты спортшылар бәйгесі өз мәресіне жетті. Бұқара халық басылым сайты арқылы жеңімпазды таңдады. Бір ай бойы жүргізілген сауалнамаға қатысқан спортшылардың барлығы дерлік сыннан сүрінбей өткен, талай додалардан дарабоз атанған шын мықтылар. Оларды облыстағы белді, белгілі бапкерлер мен БАҚ өкілдері ұсынды.

            Сонымен, байқауға жолдама алған спортшылардың арасында олқысы жоқ. Грек-рим, қазақ күресі, жұдырықтасу, көпсайыс, шаңғы тәрізді бірнеше спорт түрлері бойынша облыс, қала берді республикаға есімдері мәшһүр саңлақтарымыздың атын атап, түрін түстесек те артық емес. Сержан Теміржанов, Мирас Баршылықов және ағайынды Тоқтар мен Талғат Жиентаевтар күрес түрлерінен бақ сынаса, Дастан Беков жұдырықтасу спортынан сынға түсті. Ал Айбек Байділдинов жазғы және қысқы көпсайыс түрлерінен болса, Евгений Бондаренко шаңғы спортының шебері.

Газет жанынан құрылған әлеуметтік эмпирикалық зерттеу орталығы сайт арқылы таңдалған дауыс санын есептеп, арнайы бағдарламаның көмегімен қорытындылады. 

Көріп отырғанымыздай, халық таңдауы Сержан Теміржановқа түскен екен. Амангелділік жас сайыпқыранның жетістіктері облыс тұрғындарына жақсы таныс. Қазақ күресінен батыр атындағы ауданның мерейін үстем етіп жүрген де осы Сержан. Ол бүгінде талай тарланды түлеткен «Сұңқар» спорт клубында дайындалады.

            – «Қостанай таңы» газетінің осындай бастама көтеріп, бұқаралық спортты дамытуға үлес қосып жатқанына қуаныштымын. Сауалнамада шәкіртімнің жеңіске жеткені мен үшін үлкен мәртебе. Сержан бізде төрт жыл бойы жаттығып келеді. Осы жылдар ішінде өз салмағы бойынша облыстағы нөмірі бірінші спортшы атанып үлгерді. Мен онымен мақтанамын. Тіл-көзден сақтап, бұйырса Сержанымыз әлем чемпионатын бағындырады деп сенеміз. Ең бастысы – ерінбей еңбек ету,- дейді бапкері Жұмақан Қасымқанов.           

Сержан Теміржановтың жеткен жетістіктері:

  

 Қасқырбай Қойшыманов