Жастарды жұмысқа орналастырған “ЖАСТАР ТӘЖІРИБЕСІ”
Бағдарламаның үшінші бағыты екі қолға бір кәсіп іздеген жандарды тұрақты жұмыспен қамту. Бағдарлама қолға алынған уақыт аралығында көптеген адам мемлекеттің көмегін көрді. Қостанайдағы политехникалық колледжді жақында ғана тәмамдаған Жаңагүл Әміржанова мен Айгүл Молдахметовалар Қостанай аудандық жер қатынастары бөліміне "Жастар тәжірибесі" бағдарламасы бойынша жұмысқа орналасуда. Еңбек өтілінің жоқ болғанына қарамастан, олар Қостанай аудандық жұмыспен қамту орталығы арқылы мұнда бірден тәжірибеден өтуге мүмкіндік алыпты.
Ботагөз Ерханқызы,
аудандық жұмыспен қамту орталығының маманы:
– Бұл бағдарламаның пайдасы өте көп. Өйткені, жастар жоғары және арнаулы оқу орындарын бітіргеннен соң, тәжірибесінің жоқтығынан бірден жұмысқа орналаса алмай қиналады. Мамандығы бойынша осындай мемлекеттік қызметке тұруда бағдарламаның көмегі өте көп. Мәселен, жұмыспен қамту орталығы 2012 жылдан бүгінгі күнге дейін "Жастар тәжірибесі" бойынша заңгер, есепші, инженер, салық қызметінің маманы, механик, іс жүргізу, эколог, агроном, туризм менеджері сияқты мамандықтар бойынша 75 адамды жұмысқа орналастырды.
