«Ерліктің арқауы, елдіктің бастауы»

№2 облыстық ғылыми-әмбебап кітапханасының оқу бөлімінде Елбасы Жолдауында айтылған мерейлі даталарға арналған көрменің тұсаукесері өтті. Керме қию рәсімі тыл және еңбек ардагері О. Алмат пен қалалық «Жастар бастамалар орталығының» жетекшісі А. Ахметжановқа берілді.

Көрменің бірінші бөлімі «Ерліктің арқауы, елдіктің бастауы» қазақ хандығының 550 жылдығына, екінші бөлімі «Ерлікке тағзым» Ұлы жеңістің 70 жылдығына, үшінші бөлімі «Ата заңның асқаралы асуы» ҚР Конс­титуциясының 20 жылдығына, төртінші бөлімі «Ұлт бірлігі – ұлы байлық» Қазақстан халқы Ассамблеясының 20 жылдығына арналған. Сонымен қатар көрмедегі «Қазақстан және әлем», «Әлем мемлекеттері», «Әлем Қазақстан туралы. Әлем Президент туралы» кітаптарында ұлтаралық және дінаралық келісім жүйесін тек сақтап қана емес, оны күшейту қажет – бұл міндет тәуелсіз Қазақстанның өмір сүріп келе жатқан жиырма жылының ішінде шешілгендігі туралы материалдар жинақталған.

Көрменің ашылуында тыл және еңбек ардагері Орекен Алмат, ҚР Мәдениет қайраткері Жұмағали Өмірбек, тарихшы, белгілі қолөнер шебері Шөптібай Байділдиндер жылы лебіздерін білдіріп, белгілі жыршы Қуанышбай Қазымбек «Елім-ай» дастанынан (Қожаберген жырау) үзінді орындап берді. Өнерлі студент жастардың күшімен қазақтың атақты үш биінің (Төле, Қазыбек, Әйтеке) бейнесі сомдалды. Көркемсөз оқылып, патриоттық әндер шырқалды.

 Кешті кітапхана директоры Алма Нұрманова қорытындылап, көпшілікке көзайым болған кітап көрмесінің жыл бойы жұмыс жасайтынын айтты. 

Мұрат

     ЖҮНІСҰЛЫ

СУРЕТТЕРДЕ: Көрме тұсаукесерінен көріністер.

Суреттерді түсірген автор.

Арқалық қаласы.