5 млн. теңгеден астам ақша өндірілді
Қостанай қаласының №2 соты алаяқтық бойынша кінәлі деп танылған 1972 жылы туған Ресей Федерациясының азаматына қатысты сот үкімін шығарды.
«Багама Мама» ЖШС туристік фирмасының құрылтайшысы бола тұрып Д.Филатов ағылшындық «Baxter Vacations» демалыс клубы өкілі ретінде Қостанай қаласының тұрғындарын алдап, мол пайдаға кенелмек болған. 2009 жылдың маусымында Филатов алдау жолымен қостанайлықтарға шетелдік демалыс клубына мүшелік рәсімдеуге уәде еткен. Берілетін сертификат құны 3 жылға 3 300 еуродан басталған. Сенімділік қарым-қатынасты пайдаланып, ол бес миллион теңгеден астам ақша қымқырған.
Сот үкімімен Денис Филатов ҚР ҚК 177 б. 4 б. «б» т. бойынша (алаяқтық) кінәлі деп танылып, жалпы тәртіптегі түзету колониясында 5 жыл 6 айға бас бостандығынан айыру және мүлкін тәркілеу жазасына кесілді.Сотталушының арбауынан бес адам зардап шеккен. Сот жәбірленушілер пайдасына бес миллион теңгеден астам қаражат (оның ішінде адвокат қызметі де бар), сонымен қатар олардың екеуіне 60-80 мың теңге көлемінде моралдық залал өндірді.
Үкім заңды күшіне енген жоқ.
Қ.МАРАТҚЫЗЫ
