Шуақты шаңырақ
Қаланың қақ ортасынан бой көтерген Достық үйі 2007 жылы ашылыпты. Оған дейін әр жерде орын тепкен этномәдени орталықтар енді бір жерге шоғырлана орналасып, өздерінің жұмыстарын жүйелі жүргізе бастады. Бұл еңселі ғимараттың салтанатты ашылуына Елбасы Нұрсұлтан Назарбаевтың өзі қатысқан болатын. Бұл біздер үшін мақтаныш. Мұндай ғимарат бұған дейін қолы мен мүмкіндігі жеткен жерде орналасып жүрген ұлттық-мәдени орталықтардың арманы болатын. Достық үйі этномәдени орталықтардың жұмысына жаңаша бағыт пен серпін берді деуге де болады.
Қазір мұнда орталықтың мүшелеріне мемлекеттік тілімізбен қатар өздерінің ана тілін оқытып, үйрету үшін жексенбілік мектептер жұмыс істейді. Қазақ тілін үйренуге қай ұлттың өкілі болмасын ыждағатты екен. Ғимаратта әр орталықтың жеке бөлмесі, ортақ би залы, көрермендер залы бар. Қажетті құрал-жабдықтармен қамтылған. Орталықтардың көркемөнерпаздар үйірмелері мен қолөнер шеберлерінің жетістіктері де жетерлік.
"Мугунхва" (корей), "Мечта" (украин), "Русская песня" (орыс) секілді халықтық хор ұжымдары, татар-башқұрт, армян, әзірбайжан, тәжік ұлттық орталықтарының халықтық ансамбльдері, би тобы, драмалық үйірмелері мерекелерде, түрлі мәдени шараларда және байқау-конкурстарда өнерлерін ортаға салып, береке мен бірліктің көрігін қыздырудан жалыққан емес. Этномәдени орталықтардың өнерпаздары әртүрлі халықаралық байқаулардан оза шауып, жүлделі орындардан да көрініп жүр. Достық үйінен әр ұлттың әуезді үні естіліп, әсем әуендері қалықтайды. Ән мен күй бірлігі мықты берекелі елдің сәнін келтіріп, салтанатын арттыратыны сөзсіз.
Достық үйі осындағы этномәдени орталықтардың өнерін ғана дамытып қоймайды, түрлі бағыттарда жоспарлы жұмыс жүргізеді. Достық пен бірліктің нышаны іспеттес бұл ұйымдар көптеген іс-шаралар өткізіп тұрады. Корей тілі мен мәдениет күндері, Ана күні, Әзіл күні, қайырымдылыққа арнал-ған концерттер, басқа да түрлі атқарылып жатқан шаралар – өңіріміздің мәдени жағынан дамуына зор үлес екені рас. Барлық ұлт өкілдерінің арасында "Наурыз мейрамы" ерекше аталып өтетінін жылда өзіміз де көріп жүрміз.
Бұл шаңырақ талай істердің куәсі болып келеді. Түрлі көрмелерден әр ұлттың қолөнерін, ұлттық тағамдарын көруге болады. Бұл жай ғана көрме емес, әр дүние сол ұлттың мәдениетінен, дүниетанымынан хабардар ететіні көрермен үшін маңызды. Әрқайсысы үлкен тарихтың кішкентай бөлшегіндей. Сан қилы жәдігерлер әр кезеңнен сыр шертетіндей. Ал күнделікті өтіп жататын түрлі шараларға қатысушылар мен келушілердің мұнда бас сұқпай кететіндері сирек.
Айтолқын
АЙҚАДАМОВА
