Рудныйдағы риясыз әңгіме
Мына суретте бейнеленген ерлі-зайыпты Досмағұл мен Ырысбике Сүймековтер Рудныйдағы "Қостанай таңының" нағыз жанашырлары. Бұл еңбек ардагерлері ұзақ жылдардан бері басылымымыздың тұрақты оқырмандары. Досекең Ыбырай Алтынсарин атындағы бұрынғы Меңдіқара, қазіргі Рудный әлеуметтік-гуманитарлық колледжінің ұзақ жылдар бойы басшысы болып, жас кадрлар тәрбиелеуге ерекше үлес қосты. Ал, Ырысбике өзіміздің әріптесіміз, Рудныйдағы қалалық газеттің редакторы қызметінде жемісті еңбек етті. Журналистер одағы облыстық филиалының жұмысына белсене қатысты.
Газет жанашырлары "Қостанай таңының" Рудныйдағы күндерінде болып, журналистермен емен-жарқын сыр бөлісті.
Жаңалыққа жаны құмар оқырмандарымызға бұдан бұрын хабарлағанымыздай, "Қостанай таңы" газетінің өңіріміздегі күндері одан әрі жалғаса түсуде. Бұл жолы басылымымыздың Бас редакторы Жанұзақ Аязбекұлы бастаған бір топ журналистер кезекті сапарын асты мен үсті байлыққа толы кеншілер қаласы Рудныйдағы №7 қазақ орта мектебінде болып, қалың оқырмандарымен жүздесіп қайтты. Газет редакциясы ұжымын қала әкімінің орынбасары Мақсұт Досболов, мектеп директоры Қымбат Бірманова және басқалары қарсы алды. Мектептің мәжіліс залына газеттің байырғы оқырмандары, зиялы қауым өкілдері, жергілікті билік өкілдері көптеп жиналды. Бұл сапардың облыс аймағында неліктен ұйымдастырылып жатқандығын бас редактор әңгімелеп берді. Сапарымызды әу бастан қолдап, жанашырлық танытқан жандардың бірі елімізге танымал ақын, жазушы, ғалым, публицист Серікбай Оспанұлы да сөз сөйлеп, ақжарма ниетін көрсетті. Сондай-ақ, газетімізге тағы да өзіндік қолдау көрсеткен Челябі мемлекеттік университеті Қостанай филиалының жанындағы "Жаным" сән театры ұжымы да өнерлерін паш етті. Мектеп өнерпаздары мың бұралып би билеп, күмбірлете күй төгіп ерекше әсерге бөлей түсті.
Әлсабыр Дәрменбаев,
Зейнеткер, "Рудный қаласының құрметті азаматы", "Қостанай таңы" газетінің жанашыры:
"Халық барда газет бар"
– "Қостанай таңын" 1960 жылдардан бері үзбей оқып келе жатқан байырғы оқырмандарының бірімін. Міне, бұл қалада, алғашқы комбинаттың салын-ғанынан бері 60 жылдай тұрып келемін. Газеттің содан бергі тарихын өте жақсы білемін. Кеңес заманының солақай саясаты тіпті, басылымды бастан-аяқ жауып, тағдырын күл қыла жаздаған кездерді де көрдім. Сондай қиын-қыстау кезеңді бастан өткізген сүйікті газетім осы күнге де жетті. Оқырмандарымен дидарласу қай газетті де алға сүйреп, ел ішіндегі мәселелерге үн қатып, билік пен қалың бұқараның арасына көпір болатыны сондықтан.
Жеңістің 69 жылдығы қарсаңында газет өткен тарихын қайта қозғап, әр жылдарда тізгінін ұстаған басшыларды, журналистерін бірсыпыра жазып шықты. Соған көңілім кәдімгідей қуанып қалды. Себебі, келер ұрпақ тарихты біліп жүру керек.
Газетімізде ертеректе үзбей беріліп тұратын "Бас редактор бағаны" айдары болатын. Сол кейінгі кездері көрінбей кетті. Жаңа басшы – Жанұзақ інім келгелі сүйікті айдарымызбен қайта қауыша бастадық. Сол дәстүрді қайта 
жалғағандарыңызға алғыс айтпақшымын. Жақында ғана еліміздің оңтүстік облыстарына тікелей жүретін поездың болмауы турасында көтерген мәселеңізді бірауыздан қолдаймын. Осындай түйткілдерді жиі-жиі беріп тұрсаңыздар оқырман қауымға жақсы болар еді.
жалғағандарыңызға алғыс айтпақшымын. Жақында ғана еліміздің оңтүстік облыстарына тікелей жүретін поездың болмауы турасында көтерген мәселеңізді бірауыздан қолдаймын. Осындай түйткілдерді жиі-жиі беріп тұрсаңыздар оқырман қауымға жақсы болар еді.
Сіздерге айтар бір өтінішім бар. Газет бетінен қаламыздың тыныс-тірші-лігі, кен байыту комбинатындағы жұ-мысшылар өмірі көрінсе екен деймін. Және де көше аттарын қайта өзгертіп, осы қаламызға, елімізге еңбегі сіңген азаматтар есімі лайықты беріліп жатса деген тілектер айтқым келеді. "Газет жанашыры" деп құрметтеп жатқандарыңызға дән ризамын. Биағаң іргетасын қалаған сүйікті газетім "Қостанай таңына" жанашырлық етпегенде, азаматтығыма сын болмай ма? Халық бар да газет бар. "Қостанай таңы" халықтың сөзі, үні!
Мақсұт Досболов,
Рудный қаласы әкімінің орынбасары:
Тыңнан түрен салған
– Облыста алдыңғы лекте тұрған байырғы басылым "Қостанай таңы" газетінің қоғам өмірінде алар орны ерекше. Сонау қиын-қыстау заманда Мұхамеджан Сералин мен Бейімбет Майлин тыңнан түрен салып, газеттің іргетасын қаласа, бүгінде оның ізбасарлары ата жолын абыроймен жалғастырып келеді. Бұған дәлел – газеттің бүгінгі бет-бейнесі, бағыт-бағдары.
Қазіргі таңда бұқаралық ақпарат құралдары халық санасында қазіргі заман адамының өмірі мен қызметінің салтын қалыптастырып, азаматтардың мінез-құлқы мен дүниетанымын реттейді, саяси ұстанымдарына ықпал етеді. Осы тұрғыдан алғанда Қостанай облысында "Қостанай таңы" газетіне жететін басылым жоқ. Сондықтан басылымның одан әрі өркендеп дамуына біз де қолдан келген көмекті жасауға даярмыз. Сіздерге шығармашылық табыс, істеріңізге сәттілік тілеймін. Оқырмандарыңыз күн санап арта берсін!
Серікбай Оспанұлы,
Ақын, Қостанай мемлекеттік педагогикалық институтының профессоры:
"Газет ең алдымен халыққа қызмет етуі керек"
– Жаңа ғана Әлсабыр ағамыз өте орынды айтты. Газет ең алдымен, халыққа қызмет етуі керек. Елдің арын арлап, зарын зарлайтын да – газет. Менің ең алғашқы тырнақалды өлеңдерім осы "Қостанай таңында" жарияланды. 6 сыныпта оқитын біздер ауылымызға "АН-2" самолеты қона қалса, бірден тұра жүгіріп пошташы ағай-апайларымызға көмектесіп, газетті таласа-тармаса оқитын едік. Бізді шығармашылық жолға тәрбиелеп, қанатымызды қатайтқан осы "Қостанай таңы" газеті болатын. Қазақ жұртының алғашқы кәсіби журналисті Мұхамеджан Сералин негізін қалаған бұл басылымда Бейімбет Майлин, Қайыржан Бекхожин, Сырбай Мәуленов, Сейіт Кенжеахметов, Кеңшілік Мырзабеков сынды таланттар шоғыры қызмет етті. Енді міне, солардың ізін жалғап, жастарға тәрбиеші болған Сәлім Меңдібаев, Дамир Әбішев бауырларымыз әлі күнге дейін еңбек етуде.
Жарық "Таңым"
Тағдырдың талмай жауын, дауылынан,
Көз жазбай қауымыңнан, бауырыңнан,
"Қостанай Таңы", бүгін арайландың,
Бастау ап Бейімбеттің ауылынан.
Жайылып әрқашанда жаның жанға,
Орандың талай отқа, жалындарға.
Алдыма ап отырушы ем Алматыда,
Қостанай, Торғайымды сағынғанда.
Едің-ау бағалысы бағалының,
Күтумен өтті өзіңді бала күнім.
Келгендей болушы едім елге барып,
Бетіңнен оқып ауыл жаңалығын.
Жетелеп енді жастық жолдарыма,
Бастайсың арманымның гүл-бағына.
Қамқор боп қанат берген "Жолым" өзің,
Алғашқы тәй-тәй басқан жырларыма.
Дарханым, данагөйім, сен шырыным,
Өсірдің бәйтерек қып ел шыбығын.
Өзіңнен өсіп-өнді Сырбай-Ғафу,
Қонысбай, Сейіт, Серік, Кеңшілігім!
Үңілсем бүгін сенің беттеріңе,
Қалықтап кеткендеймін көк төріне.
Елімнің ен тарихы сенде жатыр,
Бастайсың өткеліме, өткеніме!
Өзіңді сыйлап өстік данадай біз,
Өзіңді қимай өстік анадай біз.
Өзіңде еңбек еткен журналистер
Бір емшек емген бүгін баладаймыз!
Халықтың үні өзіңсің,шабытқа мін,
Үйлестір, үйрен, үйрет, таныт бәрін!
Жол көрсет Бақыт, Шаттық ауылына
Газетім – алып дарын, жарық "Таңым!"
оқырманға құрмет
Ғабдолла АХМЕТЖАНОВ, "Қостанай таңы" газетінің жанашыры, қала тұрғыны:
"Біреудің жырын жырлаудың қажеті жоқ"
– Менің ең алғашқы "Мектебім" деген балалық шығармам осы "Қостанай таңы" газетінде басылды. Содан бері сексеннің сеңгіріне келіп қалсам да арманымды орындап, қиялыма қанат бітірген газеттен қол үзіп көрген емеспін. "Пенде Аллаға бір адым жақындаса, Алла пендесіне 10 адым жақындайды" деп шариғатта жазыл-ған. Міне, Рудныйдың қалың жұртшылығына бас редактордың өзі бастап ұжымын ерте келіп отыр екен. Мақсат – оқырман мен редакция арасындағы байланысты нығайту, тұрғындардың ұсыныс-тілегі мен сынына құлақ асу. Ендеше, біз де төл газетімізге бар ынта-жігерімізбен атсалысып, төл перзентімізге қамқорлық жасауымыз керек. Ол үшін, біріншіден, газетті жаздырып алуымыз, екіншіден соның бетінде сөйлеуіміз, үшіншіден кемшілік болса айтып, көшті түзетуіміз керек. Сондықтан менің ойымша, редакция өте тамаша бастама жасап отыр. Ортамызға келіп, қал-жағдайын айтып, жәрдем сұрағанына шын ықыласыммен ризамын. Баяғыда бірлесіп көтеретін жүкті "Асар" демейтін бе еді. Асарға келіңдер, азаматтар!
Бас редактор Жанұзақ Аязбеков Ғабдолла Ахметжановқа "Алғыс хат" тапсыруда.
Сәлім МЕҢДІБАЙ, Бас редактордың орынбасары:
Жастық шағымның қаласы
– Журналист болу бала жастан арманым еді. Мектепте оқып жүрген кезімнен газет-журналдарға хабар-ошар жазып тұратынмын. Қолыма кәмелеттік аттестат алысымен Рудный қаласына келіп, жұмысқа кірдім. Соколов-Сарыбай кен байыту комбинаты жөндеу-механика заводына токарь болып орналастым, бұл мамандықты мектепте алған едім. Мұның да өзіндік себебі болды. Өйткені, ол кезде журналист кадрларын тек Алматыда, С.М.Киров атындағы Қазақ мемлекеттік университетінде даярлайтын және журналистика факультетіне өндірісте ең кемі екі жыл еңбек етіп, тәжірибе жинақтаған жандарды қабылдайтын. Сол еңбек өтілі болсын деп он жеті жасымда жұмысшы киімін 
киіп, үлкен өндіріс орнының өз адамы болдым. Олай дейтінім, сол 1963 жылы Ұлы Октябрь мерекесіне арналған салтанатта цех бастығы Г.М.Бергер маған «Коммунистік еңбек екпіндісі» деген куәлік тапсырып, омырауға төсбелгі қадады. Мерейім өсті, күні бүгінге дейін өмірімдегі ең алғашқы сол марапатты мақтан етемін.
Екі жылдан кейін оқуға түстім. 1966 жылы бірінші курсты бітіріп, өндірістік тәжірибеден өтуге Қостанайға келдім, сол кездегі «Қостанай таңы» газетінің редакторы Бақытжан аға Жангисиннің алдынан бір-ақ шықтым.
Бәкең бірден штаттағы қызметкер етіп, бұйрық берді, үйге барып, ата-анаңды қуант деп бес күнге іссапарға жіберді. Қашан тәжірибе мерзімі біткенше әкемдей қамқорлық жасады.
Содан бергі қырық үш жыл бойы «Қостанай таңына» қызмет етіп жүрсем, сол Бәкеңнің, көшелі азамат, көрнекті қаламгер Бақытжан ағаның арқасы, соның қолдауы, ақ батасы.
Өмір бойы сол аға сенімін ақтауға, қасиетті қара шаңырақ – «Қостанай таңының» беделін арттыруға шама-шарқымша күш-жігер жұмсап келемін. Соны мақтан етемін.
Газеттің жас тілшілері: Нұрсила Мейірімханова мен Гүлназ Алпысбаева Сәлім Меңдібаевтың қолынан куәлік алуда.
Арман Хасен, "ССКӨБ" АҚ ақпараттық орталығының басшысы:
"Көше атауларын қазақша сайратсақ қой…"
– Қашар кентін қоса алғанда, бізде 4 қазақ мектебі бар. Оларды жыл сайын жан-жақтан келіп тексереді. Тексерген дұрыс-ау. Алайда айтайын дегенім, қалалық білім бөлімінде осы мектептерді басқарып, бағыт-бағдар беріп отырған ең болмағанда бір орынбасар жоқ. Осы да үлкен мәселе. Өйткені, біздің мұғалімде-ріміз бен балаларымыз өз-дерінің көргені мен білгендерін жасап жатыр. Республикадан, облыстан нақты кәсіби көмек қажет сияқты. Осыны "Қостанай таңы" газетінің бетінде бір мәселе ретінде көрсек дейміз. Сонымен қатар, Рудный қаласында көптен бері айтылып келе жатқан, әлі де айтыла беретін бір мәселе бар. Кезінде "Лениншіл жас" газеті-не Пиалаш Балтақызы апайымыз көшелерді қазақыландыру мәселесін жазды. Ешкім басын көтеріп, жауап берген жоқ. "Ойбай бұлай болмасын, ойбай солай болмасын" деп әр нәр-седен қорқа береміз. Мысалы қазір Ленин көшесімен жүріп келе жатып, Ленин кім десең, мына балалар біл-мейді. Осыны да қаперге алсаңыздар.
Қазіргі таңда көптеген мәселелерді шымырқанып айтып, шырылдата жазатын осы "Қостанай таңы" ғана. Одан басқа барар жер, басқа газеті жоқ. Сондықтан сіздердің жазғандарыңыз билік пен халыққа жетіп, әлеуметтің рухани дамуына азық болса деген тілек бар.
Айжарық АХМЕТОВ, қала тұрғыны:
"Комбинатта оқып жүр…"
– Халықтың қамын жеп, кеншілер шаһарына арнайы атбасын тіреп отыр-ғандарыңызға көп рахмет. Артымыздағы ұрпақты ойлап, Өзбекстаннан атамекенге оралғаныма 11 жылдай уақыт болды. Құдайға шүкір, тастай батып, судай сіңіп жатырмыз. Алайда мені ана тіліміздің мәселесі қатты толғандырады. Менің екі ұлым комбинатта жұмыс істейді. Екеуінің де жаздыртып алатын газеттері "ЭкспрессК", "Магнетит", тағысын тағылар. Бір данадан келсе жарар, қос-қостап жатқан орыс газетінің бізге не пайдасы бар? Оның орнына неге бізге "Қостанай таңына" жазылыңдар деп үгіттемейді, бағыт-бағдар көрсетпейді. Ана тіліне деген құрмет осындай істерден бастау алады емес пе? Кезектен көз ашпайтын "Қазпошта" бөлімшелерінен газетті жаздырып алудың өзі айтқысыз азап. Оған мына жастардың барып, таңертеңнен кешке дейін кезекке тұруға қайдан уақыттары болсын?! Амалсыздан дайын тұрған газеттерді парақтауға тура келеді. Байырғы басылым – ата газет "Қостанай таңында" шынайы ақпараттар, тәр-биелік мәні зор материалдар мен сұхбаттар, жастар-ға арналған қосымшалары бар. Олардың жұртқа берері мол рухани азық екені даусыз. Сондықтан редакция тарапынан назар аударып, бірлестікте газеттің кеңінен насихаттаудың жолдарын қарастырсаңыздар "нұр үстіне нұр болар еді"!
Нағашыбай Серікбаев, "Қостанай таңы" газетінің жанашыры, қала тұрғыны:
"Өзімізді өзіміз қолдамасақ, бізді ешкім қолдамас"
– Газеттің алқа мүшелерінің ауыл аралап, жергілікті қалың бұқарамен кездесуі жүрекке жылы әсер етті. "Жақсының жақсылығын айт, нұры тасысын" дейді. "Бас редактордың әлемі" ініміздің көреген басшы, "байқары бардың, айтары бар" сөзге шешен екендігін дәлелдесе керек.
"Дамыған ел газет оқиды, дамушы ел радио тыңдайды, дамымаған ел теледидар көреді" деген тәмсіл бар. Олай болса, сіз бен біз төл газетімізді қандай деңгейде жаздырып алып жүрміз. Шыны керек, бүгінде басылым таралымы көңіл көншітпейді, оның қасында "Костанайские новостидің" таралымы көп. Бұл қазақтығымызға сын емес пе? Ғасырлар бойы бодандықта болып, еңсесі езілген, намысы тапталған, рухы сөнген халықты оятатын кез жетті. Ол үшін әр мектеп оқушысы өзінің ата-анасына газетке жазылуына ықпал етсе, газет жанашырлары үй-үйді аралап, қолға-быс көрсетуі қажет. Себебі, өзімізді өзіміз қолдамасақ, бізді сырттан келіп ешкім қолдамайды, жақтамайды. Осының барлығын ескерген жөн. Құр сөзден, нақты іске кірісейік, мұқтарам жамағат!
Қымбат Бірманова,
№7 орта мектебінің директоры:
"Мектеп өмірін қамтитын мақалаларды көрсек дейміз"
– "Қостанай таңы" газетінің қаламыздағы күндері өтіп, оқырмандармен жүздесіп жатқаны біздер үшін жақсы жаңалық. Газет оқырмандары осы жүздесу арқылы көкейде жүрген ойларын айтып, пікір алмасуда. Мектеп ұжымы атынан Сіздерге алғыс айтамын. Мектеп өмірін қамтитын мақалалар газет беттерінен жиі-жиі көрініп тұрса, біздер үшін жақсы болар еді. Жас ұрпақты тәрбиелеу мақсатында "Айналайын" беттері, "Жастар kz" қосымшалары жаңаша түрленіп, ажары әсемденіп келеді. Мұғалімдеріміз, оқушыларымыз қызыға оқитын болды. Газет редакциясына біздегі бір тілек – алдағы уақытта басқа мектептердегі тың жаңалықты беріп тұрсаңыздар екен. Біз сол арқылы тәжірибе алмасып, өрісімізді кеңейте түсеміз.
Анжелика Ткаченко,
Әлеуметтік зерттеу орталығының жетекшісі
Зерттеу орталығы – жаңа құрылым
Оқырмандармен жүздесу кешінде газет тілшілері Қыдырбек Қиысқан Қазтуған жыраудың термесін төгілтсе, ақын Нұрболат Мешітбаев жырдан шашу шашты. Қымбат Досжанова әсем әнімен жиналған жұртты тәнті қылды.
"Қостанай таңы" газетінің жанынан құрыл-ған әлеуметтік зерттеу орталығының жетекшісі Анжелика Ткаченко сөз сөйлеп, орталықтың қызметі төңірегінде әңгіме өрбітіп, халық назарына қысқаша бейнебаянды ұсынды. Сондай-ақ, Бас редактордың орынбасары Жұматай Кәкімжанов басылымның жаңадан ашылған электронды сайты жайында оқырмандарға баяндап берді.
Танымал әнші, Е.Өмірзақов атындағы Қостанай облыстық филармониясының әншісі Манапбек Қадыров "Қостанай таңының" оқырмандарына Үкілі Ыбырайдың "Жиырма бесі" мен Серік-бай Оспанұлының сөзі мен әніне жазылған "Тобыл ағады" әндерін тарту етті.
Серік МЫРЗАХМЕТОВ, №19 мектептің директоры
«Бала жастан қолымнан түспейтін газет еді»
Бүгінгі кездесуге ерекше қуанып отырмын. Өйткені, «Қостанай таңы» бала жасымнан қолымнан түс-пейтін газетім еді. Қазір білім ордасына жетекшілік ете жүріп, мұғалімдер мен оқушылардың ата-аналарының да осы газетке жазылуына кеңес беріп отырамын. Рудный қаласында облыстық басылымның таралымы жылдан жылға артып отырса, онда біздің де үлесіміз бар деп білемін.
Жаңа қаладағы №7, №15 мектептерге, Ыбырай Алтынсарин атындағы колледжге және басқа мекемелерге редакцияның алғыс хаты тапсырылды. Залда отырып, апырай-ай, мұн-дай құрметке біз де лайық едік-ау деген ой келді. Әрине, бұл өкпе емес, оқырман ретіндегі наз.
РЕДАКЦИЯДАН: Құрметті Секе! Назыңыз өте орынды. Сол наздың артында да «Қостанай таңына» деген шынайы құрметіңіз бен жанашырлығыңыз жатқанын сезіп отырмыз
Осынау жолдарды Сізге деген алғыс, ризашылығымыздың бір көрінісі деп қабылдаңыз. Өзіңіз сияқты жанашырлар барда «Қостанай таңының» да жалауы желбірей бермек.
Райса Тоймырзақызы, психолог, қала тұрғыны:
"Тілге шорқақтық танытпайық"
– "Қостанай таңы" газетінің тұрақты оқырмандарының бірімін. Бұл жерге шетелден қоныс аударған қазақ бауырларының атынан шығып тұрмын. Өзім Өзбекстаннан көшіп келдім. Газет беттерінен біз сияқты жандарға арнайы бет бола ма, әйтеуір, біздің өмір-тағдырымыз жайында мақалалар жарияланып тұрса, нұр үстіне нұр болар еді! Жақында ғана Елбасы Нұрсұлтан Назарбаев шетелдегі ағайындарымызды көшіріп әкелу мәселесін тағы да бір көтерген еді. Бұл туралы кеңінен газет беттерінен мақалалар ұйымдастырылды. Дәл сондай үлгідегі материалдарды "Қостанай таңынан" көрсек пе дейміз. Олардың көшіп келгеннен кейінгі тағдыры, тұрмыс-тіршілігі, азаматтық алу мәселелері жарияланып, біздер оқып жатсақ, қандай ғанибет болар еді. Екінші бір мәселе, басшыларымыз қазақ тілінде емін-еркін сөйлесіп, өз ойын ана тілімізде жеткізіп жатса, қуанып қалар едік. Өз тіліне шорқақтық танытпаса деймін!
Жанашырлар клубы құрылды
Жаным сән театрының ұжымы өнер көрсетуде
Өнерлі отбасының ұрпағы, тұрақты оқырманымыз Динара Жүмекенова алғыс айтуда
Сондай-ақ, жазу өнеріне талаптанып, талпынып жүрген, тырнақалды туындылары газет бетінен жарық көрген жас тілшілерге белгілі журналист-жазушы Сәлім Меңдібай "Қостанай таңының" жас тілшісі" куәліктерін табыс етті. Олардың арасында Гүлназ Алпысбаева, Нұрсила Мейірхановалар бар.
Алдағы уақытта "Қостанай таңының" күндері басқа өңірлерде де жалғаса береді.
(Газетіміздің Рудный қаласында өткен күндерінің
толық суреттері мен бейнебаянын сайтымыздың
галерея топтамасынан тамашалай аласыздар).
