Әдеби марафон басталды
Қостанайдағы Н.Островский атындағы қалалық кітапханада әдеби марафон басталып кетті. Аталмыш іс-шара ҰОС-дағы Жеңістің 70 жылдық мерейтойын насихаттауға арналып отыр.
Акция "Соғыс естеліктері жүрегіміз бен кітаптарда" деп аталады. Іс-шара биылғы жылдың қаңтар және мамыр айлары аралығында өтеді. Оған қаладағы кез келген оқырманның қатысуы-на болады. Ең басты талап – кітапханаға барып, соғыс және майдангерлер туралы кітаптарды оқу керек. Әдеби марафонның үздік оқырмандарына сыйлықтар бар.
Акцияның алғашқы күнінде кітапханаға А.Байтұрсынов атындағы ҚМУ-дың студенттері келді. Кітапханашылар шәкірттерге әр кітаптың мазмұнын қысқаша айтып берді.
– Бұл бастаманың мақсаты – кітапханаға оқырмандарды тарту. Жастарды кітап оқуға шақыру, олардың қызығушылықтарын ояту. ҰОС туралы әдеби, тарихи кітаптарды насихаттау үшін осы жобаны қолға алдық, – деді "Қостанай қалалық мәдениет және тілдерді дамыту бөлімінің орталықтандырылған кітапхана жүйесі" ММ басшысы Айгүл Сейдахметова.
Суретте: акцияның алғашқы қатысушылары.
Суретті түсірген Айбек ЖҮЗБАЙ.
