Алла үйін салуға қолдау білдірейік!
Иә, тәуелсіздігіміздің арқасында әрі Елбасымыздың қолдауымен бүгінде еліміздің көптеген өңірлерінде жаңа мешіттер бой көтеруде. Біздің Қостанайдың орталығында да қазіргі заманға сай көрікті бір мешіт қажет болғандықтан 2010 жылы қаламыздағы "Наурыз" шағын ауданында жаңа мешіттің іргетасы қаланған болатын. "Көп түкірсе – көл" деген емес пе, игі іске облыстағы іскер азаматтар мен қарапайым халық та өз үлестерін қосып, шамалары жеткенше ақша аударып жатты. Біздің "Қостанай таңы" газеті де "Үлес қосайық, ағайын" деген айдармен қаржы аударғандардың есімдері мен қаражаттың көлемін жариялап отырды. Осылайша, демеушілер мен жергілікті халықтан қомақты қаржы жиналып, Алла үйінің біраз бөлігі салынып қалған еді. Жалпы, осы уақытқа дейін 600 млн. теңгеге құрылыс жұмыстары жүргізілген көрінеді, соның 8 млн. теңгесі халықтан, ал қалған қаржы облыс әкімінің ұйымдастыруымен жиналған. Ал, өткен жылы облыс әкімі Н.Садуақасов мешіттің құрылысына деп 43 млн. теңге аударыпты. Бірақ, зәулім мешіттің құрылысы әлі күнге дейін аяқталар емес, құрылыс жұмыстары да қазір тоқтап тұрғанға ұқсайды. Облыстың бас имамы да әзірге құрылысқа қаражаттың қолбайлау болып отырғандығын айтады.
– Қазіргі таңда қаражат мәселесі ақырындап жиналып жатыр. Былтыр біз қаражат жиналатын болса, қар түскенше мешіттің есік-терезесін салып, жылу жүйелерін тартып, осы қыс бойы ішкі жұмыстарын жасауды жоспарлап едік. Бірақ, қаражаттың аздығына байланысты бұл жұмыстарды бастай алмадық. Ал, енді қазір қолымыздағы бар қара-жатқа терезе-есігін салғанның өзінде, бәрібір қаражаттың қолбайлау болатын түрі бар. Бүгінгі таңда күмбездері жасалып, төбесі толығымен жабылды. Ал, қалған жұмыстар қозғалған жоқ, сол қалпында. Қаражат жиналып жатқан жоқ деп айтуға да болмас, аздап болса да түсіп жатыр, – дейді Асылхан Түсіпбек.
P.S. Иә, қазір бұл мешітке сұраныс аса айтарлықтай артып отыр деу артық болар. Себебі, қаламыздың тоғызыншы шағын ауданында Алла үйі іске қосылды. Дегенмен, басталған істі аяқсыз қалдыру да әсте жарамас. Сондықтан, Алла үйінің тезірек аяқталуына көп болып атсалысайық, ағайын. Егер мешіт салуға өз үлесімді қосайын, сауапты істен құр қалмайын деген кісілер болса, "Қазақстан Халық банкі" арқылы мешіттің мына есеп-шотына қаржы аударып, материалдық қолдау көрсетулеріне болады.
Марал ишан мешітінің есепшоты:
(ИИК) KZ886010221000045354
БИК HSBKKZKX
БИН 010141003301
Қарлығаш
ОСПАНОВА
Төлемді белгілеу: "Жаңа мешіттің құрылысына материалдық қолдау".
