Өндіріске өріс кең

2015-2019-жылдарға арналған үдемелі индурстриялық-инновациялық даму бағдарламасы  негізгі төрт сектор бойынша жүзеге асырылмақ.  Бұлар  шикiзат, өңделетiн өнеркәсiп, инновациялық бағыт немесе  болашақ экономика секторы,  жұмыспен қамту. Осы төрттіктің негізгі міндеттері мынадай:  макроэкономикалық тұрақтылық пен дамудың қаржылық базасын нығайту, дамудың сапасын қамтамасыз ету және  бәсекелестiктi арттыру.

– ҮИИД  арқылы Арқалық қаласында жүзеге асып жатқан нақты жобалардың бірі – жылына 300 млн. жұмыртқа өндіруге қауқарлы "Агроинтерқұс" фабрикасына үлкен үміт артып отырмыз. Өздеріңізге белгілі, бұл нысан осыдан төрт жыл бұрын пайдалануға берілді. Жоба жүзеге асқалы бері кәсіпорын жұмысы алға баспаса, төмендеген жоқ. Бүгінде мұнда  581, 778  құс өсіріледі. Өткен жылы  100, 07 млн. дана жұмыртқа өндірді. Кәсіпорын  242 адамды жұмыспен қамтып отыр, – дейді қалалық кәсіпкерлік бөлімінің басшысы Дархан Хамзин.

Өңірде қолға алынған тағы бір қуатты жоба, ол мал бордақылау алаңы. Мұны  "Нұр-жайлау НС" серіктестігі іске асырды. Болашақта   серіктестік 3000  ірі қараға дейін өсіріп, ет өндіруге тиісінше үлес қосуды мақсат етіп отыр. Сол арқылы Торғай өңірінің  азық-түлік қауіпсіздігін нығайту, халықты жұмыспен қамтуға белсене араласпақ. Жоба облыстың индустрияландыру картасына кірген. Әзірге шаруашылықта 140 адам жұмыс  істейді.

Арқалықта қуаты 48 МВт. жел электр станциясының құрылысы басталғанынан да жұртшылық жақсы хабардар. Бұған "Каz Wind Enеrgi" ЖШС-і тапсырыс берген. Жобаның жалпы құны 15 млрд. 850 млн. теңге. Бұл да  облыстың индустрияландыру картасына енгізілді. Қазіргі уақытта жобаны қаржыландыру үшін халықаралық қаржы институтымен келіссөздер жүргізілуде. Яғни оның жүзеге асу мерзімі 2016 жылға дейін ұзартылған. Әзірге өндірістік нысанның құрылыс жұмыстарына 50 адам тартылды. Ал, кәсіпорын  іске қосылғанда қосымша тағы 10 адам жұмыспен қамтылатын болады.

Дамудың даңғыл жолына түскен өңірде бұдан басқа тың жобалар таяу болашақта ел игілігіне айналады дейді мамандар. Мәселен, "Нұр-жайлау АСТЫҚ" ЖШС сыйымдылығы 32 000 тонна астық және майлы дақылдарды сақтау желілік элеваторын салуға ықылас білдірді. Жалпы құны 714,0 млн. теңгеге бағаланған кәсіпорын іске қосылғанда 30 адамды жұмыспен қамтуды жоспарлап қойыпты. Өндірістік нысан 2016 жылы пайдалануға беріледі. Дәл осындай жобаны "Эксклюзив" серіктестігі де қолға алды.  Сыйымдылығы 12 000 тонна астық және майлы дақылдарды сақтау желілік элеваторының құрылысы үстіміздегі жылы аяқталады.

Ел дамуының тірегіне айналған  ҮИИД  бағдарламасы арқылы бақша өнімдерін өндіру және сақтау, қаладан мал сою пунктін ашу, кірпіш зауытын салу көзделген. Осы  жобалар жүзеге асқан жағдайда қалада тағы да 100 адамға жаңа жұмыс орны ашылады.

Орайы келгенде айта кетейік, Арқалықта жасанды су қоймаларын балықтандыруға арналған ауқымды жобаның басталғанына да бірнеше жылдың жүзі болды. Қала маңында боксит өндіруден пайда болған жасанды су қоймаларының кейбірінің тереңдігі 60 метрге дейін барады. Жобаға бөлінген бастапқы инвестицияның ауқымы 10 млн. теңге. Алғашында жасанды көлдерге 300 мыңнан аса тұқымдас майшабақтар жіберіл-ген. Бүгінде балықтар өсіп, жетіле бастады. Бақылау барысы анықтағандай, бір жылда  шабақтардың  салмағы 1 кг.-ға жуықтады. Кейін қазынадан  қосымша тағы 5 млн. теңге қаржы бөлініп, бұл жолы  албырт тұқымдас балықтар әкелінді. Мамандар балық өсіруге қаланың жасанды су қоймаларының аса қолайлы екендігін алға тартады. Яғни енді үш жылдан соң бұл маңнан  балық аулай беруге әбден болады. Ілгеріде балық шаруашылығының өндірістік базасын құру мәселесі де құзырлы орындар тарапынан талай мәрте қозғалған еді. Келешекте қалтарыста қалып бара жатқан осындай жобалар оң шешімін тауып жатса – қала өндіріс алаңына айналып, экономикасы одан әрі ілгерілей берері хақ.        

Мұрат

      ЖҮНІСҰЛЫ

Арқалық қаласы.

Суреттерде: Арқалық қалалық кәсіпкерлік бөлімінің басшысы Дархан Хамзин; жүзеге асып жатқан инвестициялық жобалар.

Суреттерді түсірген автор.