Ерекеңді ел біледі
Облыстық «Қостанай таңы» газетінің тілшісі, Қазақстан Жазушылар одағының, Қазақстан Журналистер одағының мүшесі, кіндік кесіп, кір жуған туған жері – Әулие-көл ауданының құрметті азаматы, Қазақстанның мәдениет қайраткері Ермекбай Хасеновты 65 жасқа толған мерейтойымен құттықтаймыз.
Біздің Ерекең Орал педагогика институты қазақ тілі мен әдебиеті факультетін бітірген соң Әулиекөл ауданында мұғалім, мектеп директоры, аудандық оқу бөлімінің инспекторы болып жемісті еңбек етті. Облыстық газетке хабар-ошар, мақала жазып тұратын қаламының желі бар қоғамдық тілшіні сол кездегі редакция басшылығы қызметке шақырған еді, содан бергі қырық жылдай уақытта Ермекбай Қайыпұлы осы «Қостанай таңының» қиынға салар, сенім артар қызметкерлерінің бірі болды.
Ол Кеңес Одағының Батыры Сұлтан Баймағамбетов, Социалистік Еңбек Ері Қабидолла Тұрғынбаев туралы деректі хикаяттардың, басқа да көптеген публицистикалық және әдеби шығармалардың авторы. Қостанай меценаттар клубы «Қазына» сыйлығының, басқа да мәртебелі марапаттардың иегері.
«Қостанай таңы» газеті редакциясының ұжымы әріптесімізді мерейтойымен құттықтап, ұзақ та бақытты ғұмыр, мықты денсаулық, шығармашылық табыс тілейді.
«Қостанай таңы» газеті редакциясының ұжымы.
