Украиналық хорға 20 жыл

Рудный қаласындағы «Орбита» демалыс орталығында «Мрия» халықтық украин әндерінің хоры өзінің 20-жылдық мерейтойын атап өтті. Өнер ұжымы әннен шашу шашып қана қоймай, тыңдармандарына ұлттық тағамдарынан дәм татқызды.

«Мрия» – көптеген қалалық және халықаралық байқаулардың жеңімпазы. Оның репертуарындағы 100-ге жуық әннің арасында қазақ халқының әндері де баршылық. Мерейтой иелері сахнада тың мен комбинаттың 60-жылдығына, Жеңістің 70-жылдығы мен Қазақстан халқы Ассамблеясының 20-жылдығына орай арнайы әзірлеген нөмірлерін көрсетті. Шара барысында «Мрияның» әріптестері «Байрам», «Калина», «Соседи» шығармашылық ұжымдары да өз өнерін ортаға салып, мерекенің көркін қыздыра түсті.

 

Қуаныш Сейдоллаұлы