Жас маман үшін маңызды жоба

Өткен жылы 65 рудныйлық «Жұмыспен қамтудың жол картасы 2020» бағдарламасының «Жастар практикасына» қатыстырылды. Бұл туралы «Жұмыспен қамту орталығының» директоры Елена Рублева хабарлады. Оның айтуынша, бағдарламаға ЖОО немесе колледжді бітіргеніне 3 жыл толмаған кез келген жас маман қатыса алады.

-«Жастар практикасы» – жас маман үшін маңызды жоба, таптырмас мүмкіндік. Біз жастарды өз мамандықтары бойынша кәсіпорындарға орналастырамыз. Мұнда олар мемлекеттен төленетін 35676 теңге жалақыны алып қана қоймай, еңбек кітапшасына жазулар енгізіліп, тәжірибе жинақтайды. Ал алты ай өткен соң жұмыс берушінің көңілінен шығып жатса, тұрақты жұмысқа алынбақ, – дейді Елена.

Айта кетерлігі, өткен жылы Рудный қаласының жоғары және арнаулы оқу орындарын тәмамдаған 1,5 мыңға жуық жас маманның 87 пайызы жұмыспен қамтылса, 8 пайызы оқуын әрі қарай жалғастырды. Әскерге шақырылғаны мен тұрмысқа шыққаны 4 пайызды құраса, 1 пайызға жуығы көкейдегі жұмысын әлі таппаған көрінеді.

Қуаныш Сейдоллаұлы