Тілдерді оқыту – жаңаша леппен
Рудный қаласындағы тілдерді оқыту орталығы «Қалалық тілдерді оқыту орталығы» коммуналдық мемлекеттік мекемесі болып заңды тұлға ретінде қайта тіркелді. Алайда атауы өзгергенімен мекеменің алдына қойылған міндет-тапсырмалары өзгермек емес. Бұндай өзгеріске облыстың барлық орталықтары ұшырағанын айта кеткен жөн.
Тілдерді оқытуды жаңаша леппен бастаған мемлекеттік мекеме басшысы Айғанша Бисенбаеваның айтуынша, өткен жылы орталықта 578 тыңдаушы мемлекеттік тілді, ал 58-і ағылшын тілін оқыса, биыл бұл көрсеткіш 660 және 110 адамды құрап отыр. Және жыл соңына дейін тілді меңгерем деушілер саны көбеймесе, азаймақ емес.
Рудный қалалық көркемсурет мектебінің мұғалімі Елена Михайлова:
– Біз бір жыл бойы қазақ тілін меңгердік. Орталық өте таза, әрі әдемі. Мұғалімдердің біліктігі жоғары, сыныбымыз қажетті оқу құралдарымен, техникалық жабдықтармен қамтылған. Мұнда оқу тегін. Бұл тіл меңгерем деушілерге жасалаынып отырған үлкен мүмкіндік, – дейді.
Қалалық тілдерді оқыту орталығының оқытушылары үстіміздегі жылдың қаңтар айынан бастап Жанпейісованың модульдік технологиясын негізге ала отыра, тәжірибе негізінде модульдік оқыту бағдарламасын жасаған. Қазіргі күні орталық сол бағдарлама бойынша жұмыс істеуде.
Соңғы уақытта Қашар кентінің тұрғындары да тілді меңгеруге бет алып отырғаны қуантады.
Айғанша Бисенбаева, Рудный қаласы әкімдігінің «Қалалық тілдерді оқыту орталығы» КММ басшысы:
«Қашар ауылы әкімінің бастамасымен биылғы жылы 50 адамды құрайтын тағы да бір топ құрылып отыр. Олар мемлекеттік тілді меңгеретін болады. Және бір топ ағылшын тілін. Бұл орайда айтарым, аумақты тарту сауалы бойынша мәселелер шешілуде. Орталықтың міндеті тыңдаушылар үшін оқыту жүйесін әдістемелік құралдармен қамту. Мемлекеттік тілді меңгеру курсына қатысушылар Қашар кенті мектебінің базасында оқытылатын болады».
Осылайша тілдерді оқыту орталығы мемлекеттік бағдарлама негізінде жүктелген мақсат-міндеттерді толыққанды жүзеге асыруда. Бүгінде мемлекеттік тілді оқыту орталықтарын аккредиттеу ісін жүргізу, сондай-ақ, олардың қызметіне рейтингтік бағалауды енгізу жұмыстары да басталғанын ескерсек, Рудныйлық орталық бұл сыннан сүрінбей өтетіндігін сенімдеміз.
«Рудный дауысы» қалалық телерадиотарату редакциясы
