“Ұлттық спорт төрешісі” атағы берілді

Әулиекөл ауданындағы Соснов ауылдық негізгі мектебінің дене шынықтыру пәнінің мұғалімі С.Есенеевтің есімі аудан, облыс, тіпті республикаға да кеңінен мәлім десек артық айтқандық болмас. Ол мұндай марапатқа өзінің спортқа деген зор сүйіспеншілігі мен жастарды салауатты өмір салтына тәрбиелеп, спортта елеулі жетістіктерге жеткізгені үшін ие болды.

Серік Ғибранұлы өзі еңбек ететін кішкентай ауыл мектебінің атын шығарды. Жаттықтырушы 2007 жылы аудан түгілі, облыс бойынша ақсап жүрген спорттың дойбы түрін қолға алды. Дойбы үйренеміз деген шәкірттерінің де спорттың осы түріне деген ынтасы артып, үйреніп те алды. Осының арқасында үлкен додаларда оза шауып, чемпион атанды. Бұл, әрине, ұстаз еңбегінің ақталғаны. Жаңа Қой жылы қарсаңында ҚР Мәдениет және спорт министрлігі, спорт және дене шынықтыру комитетінің бұйырығымен Серік Есенеевке дойбыдан Қазақстан Республикасының Ұлттық спорт төрешісі атағы берілді.

Жаттықтырушыны бұл атағымен біз де құттықтай отырып, оның атағын шығаратын шәкірттері әлі де көп болсын деп тілейміз!

Қарлығаш

         ОСПАНОВА