Жол жүру бағасы неліктен қымбаттады?

Биылғы жылдан бастап облысішілік бағыттардағы жо-лаушылар жолақысы көтерілді. Билет алған жолаушы билет құнының анау-мынау емес, қалтаға кәдімгідей салмақ сала көтеріліп шыға келгеніне аң-таң. Бензин бағасы арзандап жатқанда "мұнысы несі?" дегендер де бар. Автобуспен жол жүретін ағайын елең етіп, сонда қанша теңгеге көтерілді екен деуі де орынды. Мысалы, Әулиекөл ауданына билеттің құны бұрын 560 теңге болса, қазір 805 теңге. Енді бағаның қаншалықты көтерілгенін есептей беруіңізге болады.

"Бұған не себеп?" деген сауалды облыстық жолаушылар көлігі және автомобиль жолдары басқармасына жолдадық. Олар мұндай бағаның былтырғы жылдың аяғында белгіленіп қойғанын айтты. Сөйтсек былай екен: "Отынға, жанар-жағар май материалдарына, автомашиналарға, аккумуляторлар мен босалқы бөлшектерге бағаның өсуіне байланысты жүйелі қалааралық, облысішілік бағыттарда жолаушылар жолақысының құны 2015 жылдың 1 қаңтарынан бастап көтерілді және ол 1 жол/км 7 теңгені құрайды". Соңғы рет баға көрсеткіші 2011 жылы қосылыпты. Содан бері баға еш өзгермеген. Бірақ, жолаушы тасымалдаушылардың шығындары өскен. Арнайы тарифті есептеу арқылы баға 44 пайызға көтерілді.

Ал, қалаішілік жол жүру құны әзірге өзгеріссіз қалмақшы.

Айтолқын

        АЙҚАДАМОВА