Еңбектері ерен, есімдері ерек
Бүгін Қазақстан Тәуелсіздігінің 30 жылдық мерейтойына орай «Тәуелсіздік тұлғалары» облыстық Патриоттар форумының жеңімпаздарын марапаттау рәсімі өтті. «Патриотизм» тақырыптық бағытында ұйымдастырылған салтанатты шараға аймақ әкімінің орынбасары Бақыт Есімова қатысты.
Жыл сайын облыстық ішкі саясат басқармасы ҚР Мемлекеттік рәміздер күні өңірімізде Патриоттар форумының жеңімпаздарын марапаттау салтанатын дәстүрге айналдырған. Форумның мақсаты – аймағымыздың аудан-қалаларында елжандылығымен көзге түсіп, азаматтық үлгі-өнеге танытып жүрген белсенділерді анықтау әрі олардың жарқын істерін көпшілікке жария ету.
Биылғы мерейлі жылы өңіріміз бойынша 15 адам 10 номинация бойынша Форум жеңімпаздары атанып отыр. Айта кетейік, бұл жолы марапат алушылардың барлығы бірдей облыс орталығына шақырылған жоқ. Шалғай өңірлердегі ерекше есім иелеріне сый-сияпатты жергілікті басшылар табыстайтын болады.
«Спорт саласындағы жетістіктері үшін» – Петр Костенко (Қостанай қаласы), Алексей Лукутин (Лисаков қаласы);
«Мәдениет және өнер саласындағы жетістіктері үшін» – Руслан Бушинский (Қостанай қаласы).
«Денсаулық сақтау саласындағы жетістіктері үшін» – Қайрат Бегенов (Қостанай қаласы).
«Білім және ғылым саласындағы жетістіктері үшін» – Қанат Есенғұлов (Қостанай қаласы), Алтын Молдашева (Рудный қаласы).
«Көрсеткен ерлігі үшін» – Ержан Хасенов (Қостанай қаласы).
«Еңбектегі жетістігі үшін» – Күлай Мұхмеджанова (Қостанай қаласы), Владимир Бондаренко (Денисов ауданы).
«Тарихи-мәдени мұраны сақтауға қосқан үлесі үшін» – Батырлан Сағынтаев (Арқалық), Айжан Ерғазиева (Бейімбет Майлин ауданы).
«Жастар саясатын жүзеге асыруға белсенді үлес қосқаны үшін» – Амангелді Ахметжанов (Арқалық қаласы).
«Кіші Отанына көрсеткен көмегі үшін» – Гүлсара Жаманқұлова (Жітіқара ауданы).
«Волонтерлік қызметі үшін» – Алдиар Хасенов (Жітіқара ауданы).
Төтенше жағдай қызметкерлерінің әрбір күні басын қатерге тіккен шым-шытырыққа толы десек, артық айтқандық емес. От пен су, басқа да табиғи, адами фактор салдарынан болатын оқыс оқиғалардың бел ортасында жүретін олар қандай құрметке де лайық. Бүгінгі марапат иегерлерінің бірі – облыстық ТЖД өрт сөндіру қызметінің бөлімше командирі Ержан Хасенов үшін осыдан бір жыл бұрынғы көрініс есінде ерекше сақталып қалған күн болғанмен, мұндай жағдаяттар кез келген уақытта қайталануы мүмкін. Былтыр 18 маусымда Қостанай қаласының №6 өрт сөндіру бөліміне Чкалов көшесіндегі көп қабатты үйлердің бірінен от тұтанғаны туралы хабарлама түскен. Арада 4 минут өткенде Ержан Хасенов басқаратын бөлімше қызыл жалын шарпыған жерге алғаш келіп, тұрғындарды эвакуациялау жұмыстарына кірісіп кетіпті.
Суреттерді түсірген Бағдат Ахметбеков.
