“Еліміздің еркіндігі – Тәуелсіздік”

Еліміздің теңдесі жоқ мерекесі Арқалық қаласында да кең көлемде аталып өтілуде. Сондай маңызды шараның бірі Ә. Боранбаев атындағы кинотеатрда көрініс тапты.

 Арқалық медицина колледжі мен жастар бастамалар орталығы ұйымдастырған шарада кешегі желтоқсан көтерілісінде елінің болашағы үшін жас жандарын құрбан еткен Қайрат Рысқұлбеков, Ләззат Асанова, Сәбира Мұхамеджанова, Ербол Сыпатаев сынды қазақ халқының ержүрек ұл – қыздарының рухына тағзым жасалды. Боздақтар бір минуттық үнсіздікпен еске алынып, мұхтасиф Әлмұхамед молла атындағы Арқалық қалалық мешітінің бас имамы Бектұрсын қажы Торғайбайұлы аруақтарға арнап құран бағыштады.

 Желтоқсан көтерілісінің куәгерлері, қала тұрғындары Әлия Қарсақбайқызы, Айгүл Сүлекеева, Дәмет Есенжолқызы тағылымды кештің құрметті қонағы болды.

 Салтанатты шақта колледж директоры Динагүл Мұстақапқызы, №2 облыстық ғылыми – әмбебап  кітапханасының директоры Алма Жақсылыққызы, қала жастарының көшбасшысы Аманкелді Ахметжановтар құттықтау сөз сөйледі.   Тәуелсіздік күніне арналып колледж қабырғасында өткен апталық белсенділері марапатталды. Өнерлі жастардың күшімен ызғарлы желтоқсан зардаптарын паш еткен сахналандырылған қойылымдар көрсетілді. Кітап көрмесін ұсынды.

 

Мұрат Жүнісұлы

Арқалық қаласы