Құрметке лайық деп танылды
Тәуелсіздік күніне орай, облыстың судьялары мен сот жүйесі қызметкерлерінің қатысуымен салтанатты жиын өтті. Мерекелік шараның ашылуында сөз алған облыстық сот төрағасы Ғалымжан Мырзаке жиналғандарды мерекемен құттықтап, тәуелсіз еліміздің сот жүйесіндегі жетістіктерді баяндап, осы салада зор еңбек сіңіріп жүрген бір топ үздіктерді марапаттады.
Атап айтар болсақ, тәуелсіздік күніне арналған мерекелік шарада ҚР Жоғарғы Сотының өкімімен сот жүйесіндегі мінсіз қызметі және сот төрелігін жүзеге асырудағы жетістіктері үшін ҚР Жоғарғы Сотының «Мінсіз қызметі үшін» медалімен облыстық соттың азаматтық және әкімшілік істер бойынша апелляциалық сот алқасының төрағасы Денис Шипп және облыстық сот судьясы Қылышпай Сәлмұхаметов марапатталды. Ал облыстағы мамандандырылған ауданаралық экономикалық сот төрағасы Сергей Нұровқа сот жүйесіндегі мінсіз қызметі және сот төрелігін жүзеге асырудағы жетістіктері үшін ҚР Жоғарғы Сотының «Сот жүйесінің үздігі» төс белгісі табыс етілді. Сондай-ақ, айтулы шарада сот жүйесінің ардагері Серікбай Малтабаров ұзақ жылдар бойы сот жүйесінің дамуына қосқан үлесі үшін «Сот жүйесінің ардагері» медалімен, құрметті демалысқа шыққан облыстық сот судьялары Галина Тодорова, Галина Пирогова және ардагер Нина Ткачева «ҚР Судьялар одағының құрметті мүшесі» құрмет белгісімен марапатталды.
Сонымен қатар сот төрелігін жүзеге асырудағы жетістіктері мен белсенді қоғамдық қызметі үшін ҚР Судьялар Одағы облыстық сот судьясы Серік Қайкеновке, Денисов аудандық соты төрағасы Владимир Лелекаға, Қостанай қ. әкімшілік сотының төрағасы Мақсат Сергазинге, Қостанай аудандық сотының судьясы Батырбек Құдабаевқа, қылмыстық істер жөніндегі сот судьясы Ерлік Сералинге, Қостанай қ. №2 соты судьялары Наталья Бускоға, Алтынай Байжұмановаға алғыс айтылды.
Қостанай облыстық соты төрағасының грамоталары облыстық сот судьясы Қарлығаш Исмағұловаға, Қостанай қалалық сотының төрағасы Мұрат Наймановқа, Рудный қалалық сотының төрағасы Талғат Ибрашевқа және Меңдіқара аудандық сотының судьясы Алтынай Сағындықоваға табысталды.
ҚР Жоғарғы Соты жанындағы Департамент басшысының өкімімен сот жүйесіндегі «Мінсіз қызметі үшін» медалімен марапатталу құрметіне Рудный қалалық сотының бас маманы Марина Латохина және Рудный қаласы әкімшілік сотының бас маманы Мүслима Молдагозина, «Сот жүйесінің үздігі» төс белгісіне Қостанай қалалық сотының бас маманы Татьяна Колисниченко ие болды.
Мерекелік шара соңы облыстық Е.Өмірзақов атындағы филармония әртістерінің қатысуымен өткен концерттік бағдарламаға ұласты.
Қарлығаш Оспанова
