Аудан жастарының форумы
Аудан жастарының кезекті форумында қол жеткен жетістіктер жан-жақты сараланды. Жастар 3 секцияға бөлініп, өзара пікір алысты.
Бірінші секция – "Жастардың әлеуметтік өмір сапасының жақсаруы, бос уақыттарының ұйымдастырылуы және жастарға қатысты мемлекеттік бағдарламалардың орындалуы" тақырыбында жұмыс істеді. Бұл секцияның модераторы Қ.Әбенов атындағы мәдениет үйінің директоры, жас өнерпаз Олжас Қылдыбаев болды. "Мемлекет тарапынан көрсетілетін қызметтер, жастар арасындағы өзекті мәселелер" секциясына аудандық ішкі саясат бөлімінің басшысы Нұрлыбек Тәжин жетекшілік етті. Ал А.Иманов мемориалдық музейінің директоры Нұрлыбек Игіліков болса "Жастар арасындағы жұмыссыздық, өзін-өзі жұмыспен қамту, қайта даярлау, кәсіпкерлікті қолдау бағытындағы мәселелер" секциясына модератор болды.
Форумға ауданның барлық ауылдық округ өкілдері қатысты. Олардың алдында аудан әкімінің орынбасары С.Хайруллин құттықтау сөз сөйлеп, аудан жастарын Елбасымыздың "Нұрлы жол – болашаққа бастар жол" Жолдауынан туындайтын міндеттерді орындауға ұйымшылдықпен атсалысуға шақырды.
Форумда Елбасымыздың "Нұрлы жол – болашаққа бастар жол" Жолдауы кеңінен талқыланды. Ол туралы "Нұр Отан" партиясы аудандық филиалы төрағасының бірінші орынбасары Абзал Ташимов баяндама жасады. Баяндама бойынша А.Нұр-манов атындағы орта мектептің дене шынықтыру пәнінің мұғалімі Е.Бүркітбаев, Жалдама орта мектебі география пәнінің мұғалімі М.Бекетов, Б.Қолдасбаев атындағы орта мектептің 10 сынып оқушысы И.Сағынбекова жарыссөзге шықты.
Форум соңында батыр атындағы ауданның әлеуметтік саяси экономикалық дамуына үлес қосып жүрген бір топ жастар марапатталды.
Хамитбек
МҰСАБАЕВ
Аманкелді ауданы.
Суретте: аудан жастарының форумынан көрініс.
Суретті түсірген автор.
