Орманды қорғау – орман өрттерінің алдын алу

Орманды қорғау мен күзету – орман өрттерінің алдын алу, орман ағаштарының заңсыз кесілуіне және ҚР басқа да орман заңдарын бұзушылықтар-ға қарсы күрес жөніндегі іс-шараларды жүзеге асыру, сондай-ақ орман аурулары мен зиянкестерінен, табиғи сипаттағы қолайсыз факторлардан қорғау болып табылады.

Алайда орман қорына үлкен залалын тигізетін орман өрттері туралы айтпай кетуге болмайды. 2014 жылы облыстың мемлекеттік орман қорының аумағында орман өрттерінің 26 оқиғасы болды. Өрт апатының зардабы 3 млн. 668 мың теңгені құрады. Өрттің шығу себептеріне тоқталсақ, олардың біреуі тұрғындардың кінәсінен, ал тоғызы найзағай салдарынан. 15 дерек бойынша өрттің шығу себебін анықтау мүмкін болмады. Міне, осы ретте мемлекет тарапынан өрттің алдын алу және оны болдырмау шаралары қолға алынып, бірқатар жұмыстар жүргізілуде.

Орманда өрт қауіпсіздігі тәртібін бұзғандар орман қорғау мемлекеттік мекемесінің жазалайды. Жыл басынан бері орман талабын бұзған 34 азаматқа хаттама толтырды. Қорытындысында 411 мың теңгеден астам айыппұл салынды. Табиғат заңнамасын бұзған екі адамға талап арыз берілді.

Орман өрттерінің алдын алу мақсатында көктемгі және күзгі кезеңдерде мемлекеттік орман қорына іргелес аумақтардағы шөптерді өртеу және шабу жұмыстары атқарылды. Науырзым мемлекеттік табиғи қорығы, орман шаруашылығы мекемелері биылғы жылдың өрт қаупі маусымына дайындықты аяқтады. Жалпы өрт қаупі маусымы сәуір айынан қараша айына дейін белгіленген. Осы орайда орман өрттерінің алдын алу мақсатында дайындық кезінде мемлекеттік инспекторларға техникалық сабақтар жүргізіліп, өртке қарсы құрал-жабдықтар жинақталып, жаңартылды. Орман шаруашылығы аумағындағы жол жиектерінде өртке қарсы аншлагтар орнатылды. Ал темір жол    бойында өрт қауіпсіздігі ережелерін сақтау туралы ескертулер берілді.

Жоғарыда көтерілген мәселелерге байланысты жақында облыстық табиғи ресурстар және табиғат пайдалануды реттеу басқармасы өкілдерінің қатысуымен өрт қаупі маусымының қорытындысына арналған жиын өтеді деп күтілуде.  

Ерлан ӘЛІМОВ,

облыстық орман шаруашылығы және жануарлар әлемі аумақтық инспекциясы бөлімінің бас маманы.