Жаңа оқу жылы басталды

Бүгін Қостанай қаласының барлық мектептерінде Білім күніне арналған салтанатты жиын өтті. 2017-2018 оқу жылының алғашқы қоңырауы соғылып, балғындар 1-сыныптың табалдырығын аттады. Дәл осы күні шаһар басшысы Базыл Жақыпов №115 орта мектебінде болып, педагогтар мен шәкірттерді айтулы мерекемен құттықтады.

 

Салтанатты жиналыста еліміздің Әнұраны орындалып, көк Туымыз көтерілді. Мектептің өнерлі оқушыларының қатысуымен аздаған концерттік бағдарлама ұсынылды. Қала әкімі мен мектеп директоры сөз алып, жиналған көпшілікті айтулы мерекемен құттықтады.

-Құрметті педагогтар, оқушылар мен ата-аналар. Сіздерді жаңа оқу жылының басталуымен шын жүректен құттықтаймын! 1 қыркүйек – мектеп табалдырығын алғаш аттаған бүлдіршіндер және жоғары сынып оқушылары, ата-аналары мен оқытушылардың үлкен мерекесі. Осынау шуағын шашқан арайлы күні сіздерге зор денсаулық, алға қойған мақсатқа табыспен жетуді тілеймін,-деді Базыл Жақыпов.

Алғашқы қоңырау соғылған соң, 1-сынып оқушыларына Елбасының атынан арнайы сыйлықтар табысталды. Балалар мектепке кіріп, сынып сағатына қатысты. Биылғы сынып сағаты ҚР Конституциясы мен Елбасының «Болашаққа бағдар: рухани жаңғыру» мақаласында айтылған «Туған жер» бағдарламасына арналып, «Мен – өз елімнің патриотымын» деген тақырыппен өтті.

Газетіміздің тілшілері Ғафу Қайырбеков атындағы №9 мектептегі салтанатты жиынға да қатысқан болатын. Аталған білім ошағында биыл 92 бала бірінші сыныпқа қабылданыпты.

 

Қымбат ДОСЖАНОВА

Суреттерді түсірген Бағдат АХМЕТБЕКОВ.