Ауылға келді ауыз су
![су-1](https://old.kostanaytany.kz/wp-content/uploads/2014/11/su-1-300x188.jpg)
Шұрықтан ауыл орталығына жеткізілген тұщы суды көше бойына тарту ісі де ойдағыдай жүргізілді. Ауыл іші бойынша есептегенде ол 8 километрді құрады. Сонда Байғабыл ауылына тартылған су құбырының жалпы көлемі – 12 километр 460 метр көлемді алып жатыр.
Бас мердігер "GSM Capital Group" жауапкершілігі шектеулі серіктестігінің өкілі Қожамжар Сүттібаев пен қосалқы мердігер "Строитель–2003" серіктестігінің учаске бастығы Геннадий Шоть жұмыстың сапалы орындалуына баса назар аударды. Мұның сыртында аудандық құрылыс, сәулет және қала құрылысы бөлімі КМК басшысы Нұрлан Қойшығұлов ауылға ауыз су тарту жұмысын жіті назарда ұстады. Ол жұмыс басына келген сайын істің сапалы орындалуына мән берді. Кей кездерде мердігерлерге өзінің сын-ескертпелерін де жасап отырды. Осының арқасында олардың жауапкершілігі артты.
Елбасымыздың ауыл халқына деген қамқорлығының бір белгісі – "Ақбұлақ" бағдарламасы екені белгілі. Ауыл халқы осы бағдарлама бойынша әр үйге ауыз су құбыры тартылғанына дән риза болысты.
Жақында Байғабылда ауыз су құбырының пайдалануға берілуіне арналған салтанатты рәсім өткізілді. Онда аудан әкімі Жансұлтан Таукенов ауыл тұр-ғындарын мемлекеттік "Ақбұлақ" бағдарламасы бойынша сапалы ауыз суға ие болуларымен құттықтады. Ауылға су тарту ісінде еселі еңбек еткен бір топ азаматтарға өзінің Алғыс хаттарын тапсырды.
Су құбырын пайдалануға бе-ру рәсімінің лентасын Байғабыл ауылының ең жасы үлкен 90-дағы ақсақалы Зәмзә Жанауов пен аудан әкімі Жансұлтан Таукенов қиды.
Ауылдық округ ардагерлер кеңесінің төрағасы Дүйсен Қаласов ақсақал Байғабыл халқының атынан өздерін осындай қуанышқа кенелткен мемлекетімізге, оның басшысы Н.Ә.Назарбаевқа және облыс әкімі Н.М.Садуақасовқа алғыс айтты.
![су](https://old.kostanaytany.kz/wp-content/uploads/2014/11/su-300x207.jpg)
Иә, байғабылдықтардың бұл күнгі қуанышында шек болмады. Бір-бірін құттықтап, мәре-сәре болысты. Өйткені, сапалы ауыз судың жөні қашанда бөлек қой. Мемлекетіміз үшін халқын қуантқаннан артық не бар?!
…Қарапайым ауыл халқы салтанатты рәсімнен көңілді тарасты. Олардың жарқын күлкілері көшелерді кернеп бара жатты.
Хамитбек
МҰСАБАЕВ
Аманкелді ауданы.
Суреттерде: Байғабыл ауылдық округіндегі су құбырын пайдалануға беру салтанатынан көріністер.
Суреттерді түсірген автор.