Біріксек – күшпіз

Тобыл өңірінде қоғамдық құрылымдардың көмегімен 200-ге жуық құқық бұзушылықтың жолы кесілді. Есеп беру кездесуінде облыстық полиция департаментінің бастығы Ерлан Омарбеков тұрғындардың қауіпсіз орта құруға қатысуын, сондай-ақ азаматтық белсенділер тарапынан полицейлерге көмек көрсетуді ерекше атап өтті.

«Өңірде «Сақшы» құқық қорғау бағытындағы 361 жасақ жұмыс істейді. Онда мыңға жуық адам бар. Олар 200-ге жуық құқық бұзушылықтың жолын кесті. Сондай-ақ, құқық қорғау қызметтерін сапалы көрсетудің ажырамас бөлігі қадамдық қолжетімділік қағидатын қамтамасыз ету болып табылады. Полицияның материалдық-техникалық жабдықталуы едәуір жақсарды. Мәселен, автокөлік сатып алынуда, жаңа учаскелік пункттер мен модульдік полиция бекеттері ашылып жатыр», – деді Е.Омарбеков.

Аймақта полиция жұмысының сервистік моделін енгізу барысында қазір Қостанай қаласының оңтүстік бөлігінде пилоттық жоба жүзеге асырылуда. Биыл өңірдің барлық қалалары мен аудандарында полицияның сервистік моделін кеңейту жоспарланған.

Сондай-ақ, есепті кездесуде Қостанай облысы полиция департаментінің 2023-2026 жылдарға арналған үлгілі полиция мәдениетін құру тұжырымдамасы әзірленгені айтылды. Онда азаматтардың жеке, мүліктік және қоғамдық қауіпсіздікке қажеттіліктеріне бағдарланған полиция жұмысын трансформациялау жөніндегі шаралар көзделген.

 

Қ.ҚИЫСХАН,

Суреттерді түсірген Б.КӨРКЕМБАЕВ.