Шетелге танылған кітапхана
Ақпараттың қарыштап дамыған уақытында кітапхана оқырманға кітап ұстатып, қабылдап қана отыратын орын емес. Бағыты да, мақсаты да өзгерген. Біз сөз еткелі отырған «Текстильщик» шағын ауданындағы қалалық мәдениет және тілдерді дамыту бөлімінің орталықтандырылған кітапхана жүйесі мемлекеттік мекемесінің «Северный» кітапхана филиалы әлеуметтік желіде әжептәуір танымал. Бұл туралы бізге аталған рухани орынның меңгерушісі Рәзия Тасмағанбетова айтып берді.
«Біздің «Кітапхана сөзі» деп аталатын «Ютуб» каналымыз бар. Қазірдің өзінде сексенге жуық бейнеролик салынды. Қырық мыңдай қаралымы бар. Өздеріңіз білесіздер, «Ютубта» контентті көп жинау керек. Осыдан бір жыл бұрын біздің филиал құттықтау қағазын алды. Бейнероликтер, сұқбаттар, өткізген шаралар оқырмандарға ұнайды екен. Жазылушымыз аса көп емес. Мұнда бес жүзге жуық тіркелушіміз бар. Көбі – Прибалтика, Украина, Ресей, Беларусь, Молдова және басқа да елдерден. Бізде қонақта – жерлесіміз, «Гүлдер» ансамблінің солисі Зарина Божақова болды. Елімізге танымал әр салада көрініп жүрген таланттарды шақырамыз. Ол неден басталды? Пандемия кезінде бәріміз үйде отырып жұмыс істедік. Содан әлеуметтік желіні пайдалана бастадық. «Званый гость» деген арнайы айдар аштық. Қонақтарымыз «Қазақстанның 100 жаңа есімі» жобасына енген белгілі спортшы Рустем Ерғали, ғалым-ұстаз Юрий Бондаренко, талантты жас ақын Марлен Даутов, гір тасын көтеруден халықаралық дәрежедегі спорт шебері, Азия чемпионы Яна Литвиновалар. Осындай талантты қонақтардың арқасында біздің филиал да танылды әрі көптеген елдермен рухани байланыс орнаттық», – дейді Рәзия Мұхтарқызы.
Сондай-ақ, мұнда коворкинг аймағы бар. Бұл аймақ егде жастағы адамдарға арналған. Және рухани орда жанынан ұлттық-мәдени клуб құрылып, белсенді жұмыс істеп тұр. Олар «Шаңырақ», «Мугунхва» және «Сударушка», «Молоды мы были», «Женщина – осень», сондай-ақ, казак-славян әндерін сүйіп тыңдаушылардың мүшелері мереке күндері балаларымен және немерелерімен бірге ұрпақтар сабақтастығы аясында кездесіп, өз мәдениетін, салт-дәстүрлерін таныстырады. Клубтың белсенді мүшесі 92 жаста. Ол – Вера Сугрова.
«Былтыр кітапхана ішінен екі әдеби бұрыш ашылды. Оның бірі – ақын, халықаралық «Алаш» әдеби сыйлығының лауреаты Серікбай Оспанұлына, екіншісі ақын, ҚР білім беру ісінің үздігі, ардагер ұстаз Александра Сусловаға арналды. Ол бекерден ашылған жоқ. Желтоқсан айында Серікбай ағамыздың шығармашылығына байланысты тоқсандық өткіздік. Қасымыздағы №22 мектептің бес жүзден астам оқушы біздің кітапханаға келіп, ақынның шығармашылығымен танысты. Соңында сол мектептің акт залында қорытынды үлкен кездесу өтіп, ақын ағамыз мектеп оқушыларына өлең арнады. Осы білім ошағы ағайды аяқтарынан тік тұрып қарсы алды. Бізге ақын ағамыз өзінің студенттік билетін тапсырып кетті», – дейді Рәзия Мұқтарқызы.
«Званый гость» айдары да белсенді жұмыс істейді. Жақында белгілі прозашы, экономист-оқытушы Әбутәліп Әмірмен кездесу өтті. Оған дейін де көрнекті ақын, жазушы, драматург, көсемсөзші-журналист Ақылбек Шаяхметпен кездесу екі бөліммен өтіпті. Бір қызығы, орыс тілінде сұрақ беріліп, қонақтар қазақ тілінде жауап берген.
«Мақсатымыз орыс тілді оқырмандарға, басқа елдегілерге таланатты азаматтарымызды таныстыру. Әсіресе, белгілі дәрігер Қарасай Нұровпен өткен жүздесу керемет болды. Көптеген оқырмандарымыз бізге жылы лебіздерін қалдырды. Жақында ҚР Парламентінің төртінші шақырылым депутаты Валерий Вишиченкомен қызықты кездесу болды. Осылай кері байланыс орнаттық. Оқырмандарымыз сауалдарын, тілектерін жазып жатады. Фейсбук желісінде «Кітапхана қауымдастығы» бар. Парақшамызға басқа елдердің кітапхана директорлары тіркелген. Олар да біздің жұмысымызды бағалап отырады. Кітапхана тек кітап оқитын орын ғана емес, біздің өңірімізді таныту. Шағын филиалдың жұмысы тек облыс төңірегінде ғана емес, шет елдерде де танымал», – дейді меңгеруші.
Рәзия Мұхтарқызының табандылығы мен бастамасының арқасында шағын рухани орын «Жол картасы» бағдарламасы аясында ең әдемі кітапханалар тізімінде. Оның қасбеті Қазақстан Суретшілер одағының мүшесі Сергей Луговтың АҚШ Конгресс кітапханасының стилінде аэрография әдісімен безендірілген, интерьері заманауи. Бүгінгі таңда бұл білім, ақпарат ғибадатханасы тек оқушылар мен студенттер ғана емес, зейнеткерлер үшін де тартымды орталық.
Шұға ҚОҢҚАБАЙ.
Суреттерді түсірген Бағдат АХМЕТБЕКОВ.
