Ауылда спорт қалай дамып жатыр?
Жаһандану дәуірінде жасөспірімдердің тәрбиесіне үлкен қауіп төніп тұр десе болады. Салдарынан жеткіншектер түрлі заманауи техниканың шырмауынан қайнаған нағыз тірлікті сезіне алмай жатқанға ұқсайды. Оның жалғыз дауасы саламаттылыққа баулып, ортаға шығара білу. Сол үшін де қазіргі қоғам тегін спорт үйірмелерінің жан-жақта көптеп ашылуын талап етеді. Қостанай ауданында бұл жұмыс жақсы жолға қойыла бастағаны көрініп-ақ тұр. Осы салада қырық жыл еңбек етіп келе жатқан ұстаз, білікті жаттықтырушы Рашит Мұхамеджанов бұл іске білек сыбана кіріскенін айтады. Тобыл қаласындағы Н. Наушабаев атындағы мектеп-гимназиясында оқушылардың спорттың әр түрі бойынша жарыстарға шығуын ұйымдастырумен қатар, Тобыл қаласындағы Art Sport бағдарламасымен ашылған «Барыс» клубында балғындарды дзюдоға дайындайды. Бапкердің үйірмесінде бірінші, екінші сыныптың оқушылары жаттығуларын пысықтап келеді.
«Біздің клубқа келушілер саны артып келеді. Дзюдо, грек-рим, еркін күрес үйірмелері жұмыс істеп тұр. Қатысушы әр баланың шығыны бюджеттен қаржыландырылады. Тәрбиелеп жүрген балаларымның шынайы намысқа тырысқанын қалаймын. Бұл тілегімнің ақталып келе жатқанын бір жыл ішінде Бейхан Кенжетаев, Максим Мурзин секілді шәкірттерімнің аяқ алысынан байқап келемін. Бейхан жуырда өткен Арлан Құрманғалиевті еске алуға арналған дзюдодан болған ашық турнирде үшінші орынды иеленді. Максим сол қола жүлде үшін барын салды. Бұл дегеніміз спорттың болашағының зор екенін көрсетеді», – дейді Рашит Мұхамеджанов.
Кішкентай Бейханның жүзінен қайсарлық пен намыс оты байқалады. Сүрінгенде тартынбай, шап-шағын шымыр денесімен ұстағанын жанып түсетіндей.
«Ағай бізге көп әдіс үйретті. Кілемге шыққанда: «жан-жаққа қарама, ананың аяғына қара» деп айтады. Мен ағайды тыңдап, балаларды жеңемін», – дейді ол. Жас та болса, қарсыласымен айқаса жүріп, бапкер сөзіне сол сәтте құлақ асу жақсы әдет.
Айта берсе, жергілікті жердің спорт мамандары аса жан-жақты. Бір сөзінде қазақтың ұлттық ойыны асық атудан да шәкірт тәрбиелеп жатқанын айтып калып жатыр. Тіпті, облыстық, республикалық жарыстарда олжалы болған шәкірттері де бар көрінеді. Солардың бірі осы Тобыл қаласындағы Н.Наушабаев атындағы мектеп-гимназиясының оқушысы Сабина Теміржан.
«Бізге Рашит ағай, бес-алтыншы сыныпта жүргенде сабақ берді. Сонда сабақ үстінде бізге бес асықты қалай ойнайтынын үйретіп жүрді. Содан қызығушылық оянып Илияна, Аружан деген құрбыларыммен жаттығу жиындарына барып жүрдік. Соның арқасында облыстық мектеп лигасының қола жүлдегері атандық. Кейін Талдықорған қаласында өткен республикалық ауыл жастарының біріншілігіне қатысып, екіші орын алдым. Бұл жерде ағайдың алғашқы дайындаған еңбегі қабілетімізді одан әрі дамытуға сеп болды. Арасында ата-аналарымызды жинап алып, ашық сабақ өткізуге де уақыт табатынын білдік. Ол туралы ата-анамыз үйге келіп, қызықтыра әңгімелеп бергенін талай көрдім. Сол себепті ағайымыздың, ата-анамыздың арқасында әлі де осы спорт түріне қатысып келе жатырмыз. Бұл спорт түрі адамды қолдың ептілігі мен аңғарымпаздыққа баулуымен ерекшеленеді. Алар асуымыз әлі алда деп ойлаймын», – дейді Сабина.
Міне, осылайша, Қостанай іргесіндегі Тобыл қаласының жастарын саламаттыққа шақыратын аға буынның қатары бар екеніне қуанасың.
Айбек Ғалымұлы.
