Облыста магистральдық газ құбырын жөндеу жұмысы жүргізіледі
ҚР Энергетика вице-министрі Жандос Нұрмағанбетов Қостанай облысының тұрғындарымен кездесті. Жиында өңірді жылу және электр энергиясымен қамту сондай-ақ, газдандыру мәселесіне тоқталды.
Вице-министрдің айтуынша биыл жазда магистральдық газ құбырын жөндеу жұмыстары жүргізілмек.– Президент Қасым-Жомарт Тоқаевтің тапсырмасына сәйкес елдімекендерді одан әрі газдандыру және өңірдің өнеркісіптік кәсіпорындарын газбен қамтамасыз ету үшін Ақтөбе облысынан Тобыл станциясына дейін магистралдық газ құбыры жүргізіледі, – деді вице-министр.
Жөндеу жұмыстары тамыздың басына, былтырғыдай екі аптаға жоспарланып отыр. Атқарылатын жұмыс барысында ақауы бар 45 құбырды жаңарту көзделген.Облыс әкімінің орынбасары Ерлан Спанов жөндеу жұмыстары жүргізілетін уақытта газ өшірілетінін тілге тиек етті. Алайда, желідегі қысым есебінен халық газдан ажырамайды тек, өнеркісіптік кәсіпорындарда газ өшірілуі мүмкін деді.
Жоғарыда аталған газдандыру жұмыстары толық атқарылған жағдайда облыстың 485 мың адамы табиғи газға қол жеткізе алады.
– Газ саласын дамытудың 2026 жылға дейінгі кешенді жоспары қабылданды.ол газдың ресурстық базасын ұлғайту, газға баға белгілеуді реформалау және азаматтардың әлеуметтік осал санаттары үшін бағаны тежеу жөніндегі шараларды көзейді, – деді Жандос Нұрмағанбетов.
Сонымен қатар, өңірде сұйытылған газға арналған 4 газ толтыру станциясы және 79 автомобильге газ құю станциясы бар. Облыста сұйытылған газды тұтыну былтырғы жылы 48,1 мың тоннаны құраған. Осы жыл қаңтар айында тұтынылған газ шамамен 4,6 мың тонна. Қостанай облысы үшін сұйытылған газдың 1 литріне 70-75 теңге мөлшерінде шекті бөлшек сауда бағасы бекітілген.
Сералы МЫРЗАБАЙ.
Суреттерді түсірген Б.КӨРКЕМБАЕВ.
