Қостанайда футболдан халықаралық ашық турнир өтуде
Қостанайда "Динамо" дене шынықтыру-спорт қоғамы жүлдесі үшін футболдан халықаралық ашық турнир өтуде. Іс-шараға Астана, Қарағанды, Алматы және Өскемен қалаларынан құрама командалар сондай – ақ, көршілес Ресей Федерациясынан Пермь және Челябі қалаларынан командалар қатысуда. Барлық командалар 13-14 жастағы спортшылардан жасақталған.
"Тобыл Арена" заманауи стадионында өтіп жатқан турнир көші-қон қызметінің 30 жылдығын мерекелеуге арналған. Қостанай облысы полиция Департаменті басшысының орынбасары Ардақ Ынтықбаев жарысқа қатысушыларды құттықтады.
–Қостанай облысы өзінің географиялық орналасуына байланысты Ресей Федерациясының бірнеше облыстарымен шектеседі. Шекара маңы ынтымақтастығы шеңберінде түрлі мәселелерді шешу бойынша, оның ішінде көші-қон қызметі бағытында кездесулер өткізіледі. Достық қарым-қатынас орнатуға арналған мәдени, спорттық іс-шаралар да жиі ұйымдастырылып тұрады, – деді Ардақ Ынтықбаев.
Жарысқа қатысушылар турнирді ұйымдастыруға қолдау көрсеткендердің барлығына алғыстарын білдірді. Турнир бес күнге жалғасады. Финалдық ойындар мен турнирдің жабылуы 5 ақпанда өтеді.
