Сарыкөлдік шаңғышылар сап түзеді

Сарыкөл ауданында «Бұрқасын-2016» қысқы ойындар фестивалі шаңғы жарысымен басталды.

Ашылуында аудан әкімінің орынбасары Асқар Жақсыбаев сөз алып, қатысушыларды құттықтап, сәттілік тіледі. -Өңірде бұқаралық спортқа көңіл бөлініп келеді. Жыл сайын қысқы ойындар жалғасын табуда. Бүгінгі жарыс соның бір көрінісі. Сіздердің араларыңыздан болашақта Александр Колядин секілді саңлақ спортшылар шығады деп сенемін. Ал, осы жарыста ең мықтыларың мәреге бірінші болып жетіңдер,– деді ол өз сөзінде.

Осылайша, көптен күткен шаңғы жарысы да басталды. Бұл додаға қатысушылар Барвин, Краснознамен, Сорочин, Соналы ауылдарынан  келіп отыр. Сондай-ақ, аудан орталығындағы 4 мектептің оқушылары мен колледж студенттері де бар. Барлығы – 80 адам бақ сынайтын бұл жарыс бір жарым сағатқа созылмақ.

-Бүгінгі жарысқа сақадай саймын. Сонау Соналы ауылынан арнайы келіп тұрмын. Былтыр дәл осы додада бақ сынап, біріші орынды жеңіп алдым. Биыл да сол нәтижеге қол жеткізетініме нық сенемін. Жаттықтырушым Айдын Жалкенов пен мектебімнің үмітін ақтаймын, – дейді қатысушы Артем Блинов.

Олай болса, барлық спортшыларға біз де сәттілік тілейміз! Тек кіл мықтылары жеңіс тұғырынан көрінсін!

 

Руслан ӘЛКЕЕВ.

Сарыкөл ауданы.