Жанаттың жасыл желегі
Науырзымдық Жанат Шетіғұлованың бастаған кәсібі ерекше. Ерекше дейтініміз, ол кәдімгі балғын, енді көктеп келе жатқан шөпті сатады. Бұл бизнестің де өз атауы бар екен. Ол гидропогника деп аталды.
Иә, атауы да, бастамасы да ерекше. Гидропоника тәсілімен арпа, ақ бидай, қара бидай, жүгері басқа да дәнді дақылдарды өсіруге болады. Бұдан өсірілген өсімдіктерді мал шаруашылығында үй жануарларына қосымша азық ретінде беруге пайдаланады. Қазіргі заманда кәсіп бастаймын деген адамға кедергі жоқ. Тек көзін тап. Еңбектен. Дүкен ашқың келмесе, интернет желісі арқылы сат, жарнамала. Интернетте не жоқ дейсіз, бәрі бар. Оның сыртында, кәсіп бастауда, жеке бизнес ашуда мемлекеттік қолдау механизмдері өте көп. Бизнес бастамаңыз қазіргі нарыққа икемді болса, соғұрлым жеңілдетілген қаржыландыруға тез қол жеткізуге мүмкіндік бар. Ал бизнес идеяңыз инновациялық мәнге ие болып, экономиканың дамуына әсер етіп, қоғамға пайдасы болса, онда мемлекеттік қайтарамсыз грант алуға мүмкіндік те зор.
Былтыр Науырзым ауданында “Бастау бизнес” арқылы оқып, мемлекеттік қайтарымсыз грантты жеңіп, қазір 5 адам өз кәсібін дөңгелетіп отыр. Солардың бірі – осы Жанат. Аудандықтарды ерекше бизнес-идеясымен таңқалдырып, мемлекеттік гранттың шарапатын көріп отыр. Бұл – науырзымдықтарға ғана емес, облысымызға да таңсық жоба. Қазақстан аумағында енді ғана етек жайып келе жатқан кәсіп десе де болады.
–Гидропоника дегеніміз – үй жағдайында шөп өсіру. Негізі осы мемлекеттік қайтарымсыз грант жайлы бұған дейін әлеуметтік желілерден, теледидардан естіген едім. Бірақ, осы бағдарламаға қатысу үшін Науырзым ауданында бұған дейін болмаған, бизнес-идея, жобалар қарастырдым. Солай ізденіп жүргенімде интернет желісінен гидропоника жайлы оқып, бірден қызығушылығым артып, зерттей бастадым. Жалпы, гидропоника жобасымен Қазақстан аумағында айналысып жатқан бірнеше шаруашылық бар. Солармен хабарласып, толығырақ ақпарат алдым. Бірақ қандай жабдықтар мен құрылғылар керегін білу қиынға түсті. Сонда да қайтпай ауданымызда мемлекеттік қайтарамсыз грант алуға “Еңбек” биржасы арқылы “Бастау бизнеске” өтінім беріп, оқып, сертификатқа ие болдым. Жобаны іске асыру мақсатында комиссия алдында қорғап, қайтарымсыз грант иегері атандым, – дейді жоба авторы.
Жанатқа бұл жобаны жүзеге асыру онайға түспеген. Бұл шетелде кенінен тараған, ал біздің елде енді ғана дамып келеді. Негізінен, бұл өсімдіктің төрт түлікке, малға пайдасы көп, құрамында 17 түрлі дәрумен бар. Гидропоника тәсілімен өсірілетін бидайға, дәнді дақылға арналған ыдыстарын (поддондар) табу оңай емес. Бірақ ізденсе табуға болады.
–Шөптердің пайдасын әлі түсінбейміз, бірақ халықтың қызығушылығы бар. Уақыт өте келе сұраныс артатынына сенімім зор. Өсімдікті өсірудің өзіңдік тәсілдері бар. Мал шаруашылығына қажетті өнімді алу үшін 7 күн шамасында өсімдікке арналған жарықтың астында ұстап, 3-4 рет суарылады. Дайын өнімнің 1 келісі 150 теңгеден. Таптырыс мөлшері көп болса 100 теңгеден сатамын. Яғни, бір ыдыстағы өнімнің өлшемі 6-7 келі, өсімдіктің биіктігі 15, ұзындығы 60, ені 40 см болады, – дейді жас кәсіпкер.
Жанат өзіне сенімді. Бастамасы қолдау тауып жатса, мал щаруашылығына тигізер пайдасы көп болмақ. Расымен, елімізге тың идеяларды ойлап тауып, жүзеге асырар осындай жастар керек.
Айтолқын АЙҚАДАМОВА
Суреттерді түсірген Жібек МЫРЗАҒАЛИ
Суреттерді түсірген Жібек МЫРЗАҒАЛИ
Науырзым ауданы
