Алдымен бар жағдай жасалу керек
Ауылдың жайын сол ауылда отырған адамнан артық ешкім білмейді. Мемлекеттік тұрғыда ең көп талқыланатын, ең көп реформа жасалатын, ең өзекті шешімдер қабылданатын сала – ауыл тақырыбы десем, артық айтқандық емес. Сөздің шындығы, қанша жерден заңдарға түзетулер енгізіліп, қаншама жаңашылдықтар қолға алынып жатса да, ауылдағы мәселе бір ізге түспей-ақ келеді.
Мемелекет басшысы Қасым-Жомарт Тоқаев агроөнеркәсіп кешенін дамыту ісіндегі нақты мәселелердің бар екеніне назар аударып, Үкімет пен жергілікті атқарушы органдардың алдына бірқатар міндет қойды. Елді мекендердің ең алдымен ауыз сумен қамтылуы, жол мәселесі, газ тарту қатарлы түйткілдері бар екені рас. Ал ішкі жағдайына келсек, жерді тоздырмай баптап ұстау, техника паркін жаңарту, тиімділігі жоғары дақылдарды өсіруді арттыру қай кезде де күн тәртібінен түскен емес. Ондай елді мекенде тұрғындар бір күн де отырмайды.
Өзім еңбек етіп отырған Қарабатыр елі сонау тоқсаныншы жылдардың қиын-қыстау дәуірін шашау шығармай өтті. Оған халыққа қажетті жағдайдың жасалуы зор себеп болды. Бұрыннан келе жатқан су жүйесі бар, мәдениет сарайы жаңартылды, балаларға арналған ойын алаңы жұмыс істейді, көшіп келген жұмысшыларға арнап орталық жылуға қосылған 12 пәтерлік тұрғын үй пайдалануға бердік. Бұған дейін газетте, теледидарда Қарабатырдағы атқарылып жатқан істер жайында қаншама материалдар жарық көрді.
Алайда, соңғы жылдары ауылдардан қалаға көшу үрдісі толастамай тұр. Көп елді мекендер де әлі күнге дейін жол, су, газ мәселесі бар. Депутат ретінде облыс басшылығы алдында осы жайтқа қатысты сауалдар, ұсыныстар мен өтініштер жасалды. Қамысты ауданының бірқатар мәселелерін жеткіздім.
Ауылға керегі – еңбек күші. Көшіп келемін деушілерге қай шаруашылық иесі болса да көмегін жасауға әзір. Ауылдағы ағайынның төрт көзі түгел болса, демографиямыз жақсарады, мектептегі бала саны да артады, урбанизацияға тоқтау болады.
Марат ҚҰДАЙҚҰЛОВ,
«Қарабатыр» Агрофирмасы» ЖШС директоры,
Қостанай облыстық мәслихатының депутаты.
