ІЛКІМДІ ЖОБА АЗ
Облыс әкімі Құмар Ақсақалов бүгін Қостанай, Меңдіқара, Науырзым, Сарыкөл, Ұзынкөл, Федоров ауданы әкімдерінің инвестициялық жобалар, тұрғын үй құрылысы және жолдарды жөндеуге қатысты түзген есептерін сынға алды.
Бейнебайланысқа шыққан аудан басшылары өңірлерде қолға алынуы тиіс бірқатар жоба туралы баяндаған. Бірақ, облыс әкімі жоғарыда аты аталған аудандарда ауқымды инвестициялық жобалардың өте аздығын айтты. Тіпті, кей аудан әкімдері инвест жобалардың қатарына ауылшаруашылық тауар өндірушілері салуға тиісті астық сақтайтын қоймалар мен аңғарларды, таразыларды қосып жіберген.
– Сіздер ангарлар мен таразыдан өзге көрсететін ештеңе таппадыңыздар ма? Кәсіпкерлер оны өндіріске қажет болғасын салып жатыр. Оған әкімдіктің қандай қатысы бар? Мұны инвестициялық жобаларға телу өте ұят нәрсе. Бұл таза бизнестің еңбегі. Мемлекет құрылысқа рұқсат береді, жер бөледі болды. Одан арғыға сіздердің қатыстарыңыз шамалы. Одан да ауылды дамыту үшін не істеуіміз керек, соны айтыңыздар,- деді облыс әкімі.
Қ,Ақсақалов аудан басшыларына ештеңені әшекейлемей, нақты істерді көрсету қажеттігін айтты. Ол ауылдардағы тұрғын үй құрылысына баса назар аударды. Айтуынша, бұл мәселені түбегейлі шешпей, жұмыс өнбейді.
-Мен өткен жолы да айттым, ауылшаруашылық тауар өндірушілері өз қарамағындағы жұмыскерлерді тұрғын үймен қамтуы тиіс. Қостанай, Ұзынкөл, Меңдіқара, Сарыкөл, Федоров аудандарының әлеуеті зор емес пе?! Жері шұрайлы, топырағы құнарлы. Егін де бітік шығады, мал да өсіруге болады. Ал сіздер соны кәдеге жарата алмай отырсыздар. Әр шаруашылық жетекшісі тапқан табысын елмен бөлісетін кез келді. Ауылға үй сал, жолын жөндеп бер. Сонда ғана еңбегің өтеледі,-деді облыс әкімі.
Ол жақын арада аудандарға сапары кезінде жергілікті жерде не істеліп жатқанын өз көзімен көріп, олармен егжей-тегжейлі танысатындығын айтты. Қ.Ақсақалов облыс деңгейінде ұсынылған барлық инвестициялық жобаның жүзеге асуын әкімдерден қатаң түрде сұрайтынын ескертті. Енді келесі аптада өңір басшысы төрт қала әкімінің есебін тыңдап, содан кейін облыс өнеркәсібін дамыту жөнінде кеңес өткізетіндігін мәлімдеді. Толығырақ «Қостанай таңының» кезекті санынан оқи аласыздар.
Әлібек ЫБЫРАЙ.
Суреттерді түсірген Бердіболат КӨРКЕМБАЕВ.
